លោក សាន គឹមស៊ាន ដែលមានរហស្សនាមថា គ្រូតាក្រមាមាស» នៃក្បាច់គុនកីឡា ល្បុក្កតោកម្ពុជា បានក្លាយជាស្ថាបនិកដ៏ល្បីឈ្មោះម្នាក់ ដែលបានជួយឲ្យកីឡា ល្បុក្កតោ មានជីវិតរស់ឡើងវិញ ព្រោះលោកបានចំណាយពេលវេលាក្នុងឆាកជីវិតចុងក្រោយរបស់ខ្លួនអស់រយៈជាង ១៩ឆ្នាំ ដើម្បីកសាងនិងចងក្រងឯកសារជាច្រើនព្រមទាំងមានរូបភាពគំនូរគូរដោយផ្ទាល់ដៃការសរសេរសៀវភៅ និងការផលិតឯកសារ វីដេអូ ស្តីពីក្បាច់គុនកីឡា ល្បុក្កតោ បញ្ជូនឲ្យរាជរដ្ឋាភិបាលកម្ពុជា សម្រាប់ដាក់កីឡាប្រភេទនេះចូលទៅក្នុងអង្គការ យូណេស្កូ។
បន្ថែមលើនេះលោក សាន គឹមស៊ាន បានធ្វើការផ្សព្វផ្សាយទៅកាន់ប្រទេសនានា ដែលមានវប្បធម៌គ្រឹះរឹងមាំ នៅលើពិភពលោកឲ្យបានស្គាល់ពីកីឡាល្បុក្កតោរបស់ខ្មែរ ដែលជាមរតកវប្បធម៌ដ៏ចំណាស់តាំងពីបុរាណកាល ហើយភាពល្បីល្បាញនេះបានធ្វើឲ្យក្រុមហ៊ុនផលិតខ្សែភាពយន្តដ៏ធំនៅអាមេរិក បានសុំឲ្យលោកចូលរួមថតកុន ក្នុងនាមជាតួអង្គផ្នែកយុទ្ធគុននៅ ឆ្នាំ២០១៥។
នៅក្នុងបទសម្ភាសជាមួយ ភ្នំពេញ ប៉ុស្តិ៍ កាលពីដើមសប្តាហ៍មុន លោក សាន គឹមស៊ាន បានរៀបរាប់ថា៖ «ខ្ញុំបានវិលត្រឡប់ពីសហរដ្ឋអាមេរិកថ្មីៗនេះ បន្ទាប់ពីទៅលេងក្រុមគ្រួសារផងនិងទៅបំពេញបេសកកម្មផង ដើម្បីស្វែងរកការគាំទ្រកីឡា ល្បុក្កតោ របស់ខ្មែរ ហើយខ្ញុំទទួលលទ្ធផលល្អគួរជាទីមោទនៈដោយសារយើងបានបើកសាលាបណ្ឌិត្យសភា ល្បុក្កតោ នៅសហរដ្ឋអាមេរិក និងរូបខ្ញុំផ្ទាល់ត្រូវបានក្រុមហ៊ុនផលិតភាពយន្តដ៏ធំនៅអាមេរិកសុំធ្វើកិច្ចសន្យាឲ្យខ្ញុំសម្តែងជាតួអង្គផ្នែកយុទ្ធគុនវាយតប់ដែលទាក់ទងទៅនឹងក្បាច់គុន និងវប្បធម៌ថែមទៀតផង ដែលពួកគេនឹងចាប់ថតនៅ ឆ្នាំ២០១៥ ខាងមុខ»។
គិតមកដល់ពេលនេះលោក សាន គឹមស៊ាន មានវ័យ ៧០ឆ្នាំ ហើយលោកបានចូលហាត់គុនតាំងតែពីអាយុ ១៣ឆ្នាំ ដែលការហាត់គុននេះបានជួយឲ្យលោកនៅពេលនេះនៅតែមានរាងកាយរឹងមាំកម្លាំងខ្លាំងក្លា និងសុខភាពល្អ មិនទ្រុឌទ្រោមតាមអាយុនោះទេ។ បើនិយាយអំពីវិជា្ជគុនវិញលោក គឹមស៊ាន មានខ្សែក្រវាត់ខ្មៅ ៧ ដាន់ផ្នែកកីឡា ហាប់គីដូ ដែលបានហាត់រៀនពីលោកគ្រូកូរ៉ឈ្មោះ Choung Sunho តាំងពី ឆ្នាំ១៩៦៩ មកម៉្លេះ ហើយបានបន្តហាត់ក្បាច់គុន នៅ រដ្ឋឡុងប៉ិច រដ្ឋតិចសាស់ និង រដ្ឋសានហ្វ្រាន់ស៊ីស្កូ របស់សហរដ្ឋអាមេរិក តាំងពី ឆ្នាំ១៩៨៥ រហូតដល់ ១៩៩៤។
នៅ ឆ្នាំ១៩៩៥ លោក សាន គឹមស៊ាន បានវិលពីសហរដ្ឋអាមេរិក មកមាតុភូមិវិញក្នុងគោលបំណងដើម្បីចងក្រងក្បាច់គុនបុរាណខ្មែរ ជាពិសេសកីឡា ល្បុក្កតោ នេះឯង។
ជាមួយផ្នត់គំនិតជាតិនិយមនេះ លោកបានជួបការលំបាក និងឧបសគ្គជាច្រើនដែលទាក់ទងទៅនឹងជីវភាពផ្ទាល់ខ្លួន និងការមិនសហការឲ្យបានពេញលេញរបស់មជ្ឈដ្ឋាន និងស្ថាប័នពាក់ព័ន្ធមួយចំនួនជុំវិញការចុះស្រាវជ្រាវក្បាច់គុននេះ ប៉ុន្តែលោកនៅតែជម្នះពុះពាររហូតទទួលជោគជ័យយ៉ាងធំធេង គឺការធ្វើឲ្យកីឡា ល្បុក្កតោ ដែលបានបាត់ឈ្មោះរាប់ពាន់ឆ្នាំមកហើយនោះឲ្យមានជីវិតរស់ឡើងវិញ និងមានភាពល្បីល្បាញនៅពេលនេះ។
លោក សាន គឹមស៊ាន បាននិយាយថា ក្នុងរយៈពេល ១៩ ឆ្នាំចុងក្រោយនេះ (ចាប់ពី ឆ្នាំ១៩៩៥ មកដល់បច្ចុប្បន្ន) លោកទើបតែបានទៅសហរដ្ឋអាមេរិកម្តងគត់ និងបានត្រឡប់មកវិញថ្មីៗនេះ ទោះបីជាលោកមានសញ្ជាតិជាអាមេរិកស្រាប់ និងមានប្រពន្ធ ព្រមទាំងកូនដែលកំពុងរស់នៅទីនោះក៏ដោយព្រោះលោកជាប់រវល់ទៅនឹងការងារកីឡា ល្បុក្កតោ ខ្លាំងពេក។
ឥឡូវនេះអ្វីៗរបស់ ល្បុក្កតោ ត្រូវបានលោក សាន គឹមស៊ាន និយាយថា «ជោគជ័យ» ដោយសាររាជរដ្ឋាភិបាលកម្ពុជាបានដាក់បញ្ចូលសក្តានុពលរបស់ ល្បុក្កតោ ដែលមានភាពជាក់លាក់ច្បាស់លាស់ ចូលដល់អង្គការ យូណេស្កូ រួចរាល់តាំងពី ឆ្នាំ២០១២ គឺអាចនិយាយថា ៩០ ភាគរយមានភ័ស្តុតាង និងឯកសារគ្រប់គ្រាន់ ដោយយើងរង់ចាំតែពេលវេលា ប្រកាសជាបេតិកភណ្ឌមនុស្សជាតិលើពិភពលោកតែប៉ុណ្ណោះ។
លោកបានបញ្ជាក់ថា៖ «ពេលនេះក្តីស្រមៃនៃជីវិតរបស់ខ្ញុំ ដែលមានបំណងចង់ឲ្យក្បាច់គុនកីឡា ល្បុក្កតោ ត្រូវបានទទួលស្គាល់ច្រើននៅលើពិភពលោកនោះ គឺបានដូចបំណងហើយហើយអ្នកបន្តវេនបេសកកម្មពីខ្ញុំ គឺមានថ្នាក់ដឹកនាំកីឡានៃព្រះរាជាណាចក្រកម្ពុជា ចំណែករូបខ្ញុំផ្ទាល់នឹងមានបេសកកម្មនៅក្រៅប្រទេស ដើម្បីស្វែងរកការគាំទ្រក្នុងឋានៈជាអ្នកចងក្រងស្ថាបនិក និងជាប្រធានកិត្តិយសសហព័ន្ធកីឡា ល្បុក្កតោ កម្ពុជាអស់មួយជីវិត ដែលទទួលស្គាល់ដោយស្ថាប័នគណៈកម្មាធិការជាតិអូឡាំពិកកម្ពុជា និងបានទទួលស្គាល់ពីរាជរដ្ឋាភិបាលកម្ពុជាផងដែរ»។
នៅពេលសួរដល់គម្រោងទៅថ្ងៃមុខលោក សាន គឹមស៊ាន បានគូសបញ្ជាក់ថា៖ «ខ្ញុំនឹងវិលទៅរស់នៅសហរដ្ឋអាមេរិកវិញ នៅ ឆ្នាំ២០១៥ ព្រោះនៅពេលនេះ មានសាលាបណ្ឌិត្យសភា ល្បុក្កតោ មួយនៅ រដ្ឋឡុងប៊ិច ហើយខ្ញុំបានចុះកិច្ចសន្យាថតភាពយន្តរបស់អាមេរិក ហេតុនេះខ្ញុំនឹងកសាងជីវភាពថ្មីក្នុងវ័យ ៧០ឆ្នាំ បន្ទាប់ពីប្រមូលផ្តុំចងក្រងឯកសារកីឡា ល្បុក្កតោ ជូនជាតិមាតុភូមិរួចរាល់ហើយនោះ»។
ជាមួយស្នាដៃដែលទទួលបានសម្រេចលើកីឡា ល្បុក្កតោ នៅពេលនេះ ត្រូវបានលោក សាន គឹមស៊ាន អះអាងថា៖ «ការទទួលបានលទ្ធផលយ៉ាងត្រចះត្រចង់បែបនេះ ដោយសារមានអ្នកផ្តល់ការស្រឡាញ់ និងគាំទ្រខ្ញុំ មានដូចជាឯកឧត្តម សុខ អាន ឯកឧត្តម ជាម យៀប ឯកឧត្តម ថោង ខុន ឯកឧត្តម វ៉ាត់ ចំរើន និងលោកគ្រូព្រឹទ្ធាចារ្យ ហុក ឈាងគីម ព្រមទាំងអ្នកស្រឡាញ់កីឡា ល្បុក្កតោ ជាច្រើនទៀត»។
តាមការអះអាងពីលោក សាន គឹមស៊ាន គឺកាលពី ខែមេសា ឆ្នាំ២០១៤ លោកបានបើកសាលាបណ្ឌិត្យសភា ល្បុក្កតោ មួយកន្លែងនៅ រដ្ឋឡុងប៊ិច ដោយមានសមាគមព្រលឹងខ្មែររបស់បងប្អូន ខ្មែរ រស់នៅទីនោះជួយជ្រោមជ្រែងផ្តល់ថវិកាហើយលោកអភិបាល ក្រុងឡុងប៊ិច ក៏គាំទ្រនិងជួយល្បុក្កតោខ្មែរដែរ ហេតុនេះលោក គឹមស៊ាន នឹងទៅគ្រប់គ្រងសាលាបណ្ឌិត្យសភា ល្បុក្កតោ នេះ។
គួររំឭកថា រឿងរ៉ាវប្រវត្តិពិតរបស់លោក សាន គឹមស៊ាន គឺលោកបានងប់ងុលដកចិត្តមិនរួចពីការងារក្បាច់គុននោះទេ ហើយការមិនសូវជាស្វះស្វែងរកប្រាក់ចំណូលសម្រាប់គ្រួសារបានធ្វើឲ្យស្ថាបនិកម្នាក់នេះ ត្រូវលែងលះជាមួយប្រពន្ធរហូតដល់ ៤នាក់ និងបានកូន ៥ ប៉ុន្តែប្រពន្ធចុងក្រោយនៅស្រុកខ្មែរបច្ចុប្បន្នជាអ្នកនិយមក្បាច់គុនដូចគ្នា។
គ្រួសារថ្មីនេះទទួលបានចំណងដៃកូនប្រុសតែមួយគត់ឈ្មោះ សាន អង្គររាជវ័ន្ត ដែលបានចូលហ្វឹកហាត់ក្បាច់គុនតាំងពីក្មេង។ សព្វថ្ងៃនេះ អង្គររាជវ័ន្ត មានអាយុបាន ១៨ឆ្នាំ មានកម្រិតវិជ្ជាគុនក្រមាខ្មៅ ២ ជាន់ផ្នែក ល្បុក្កតោ គ្រោងប្រឡងឡើង ៣ ជាន់នៅឆ្នាំនេះ ហើយគេជាគ្រូធំ និងជាអ្នកស្នងត្រកូលខាងកីឡា ល្បុក្កតោ ពីលោកគ្រូតាក្រមាមាស សាន គឹមស៊ាន ដែលជាឪពុក៕
1 comment:
An introduction to a timeless and elongated bathroom
Usually, a bathroom is in a square or rectangular shape in term of measurement. Nonetheless, architect Maria Arango and Diego Molina have been assigned to a different situation regarding the shape of the bathroom. This one takes a form of a long stretch edges and per request by clients, it needed to be timeless.
"One way of achieving this was to continue the material palette of travertine stone, glass and black granite found in other areas of the home – these natural materials are always in vogue." Arango stated, as quoted by reliable furniture shop in Phnom Penh
construction materials.
"Further to this, we custom designed a vanity created from a solid block of marble, with the sinks carved straight out of the block. This simple, substantial piece is matched with minimalist taps that will also retain their design relevance well into the future." added Arango.
Post a Comment