ស្ដាប់ ឬ ទាញយកសំឡេង
សកម្មភាពនេសាទត្រីរបស់ជនជាតិវៀតណាម នៅខាងលិចវត្តពោធិ៍ថ្មី ភូមិពោធិ៍ថ្មី ឃុំកោះសំពៅ ស្រុកពាមជរ ខេត្តព្រៃវែង កាលពីថ្ងៃ១៧ សីហា ឆ្នាំ២០១៣។
RFA
ប្រជាពលរដ្ឋនៅស្រុកពាមជរ ខេត្តព្រៃវែង ចោទប្រកាន់អាជ្ញាធរមូលដ្ឋាន ថាមិនអើពើចំពោះជនជាតិវៀតណាម ដែលចូលមកធ្វើនេសាទត្រីក្នុងទឹកដីខ្មែរដោយខុសច្បាប់នោះទេ។
អ្នកភូមិបញ្ជាក់ថា ត្រីដែលជនជាតិវៀតណាម នេសាទនោះ ភាគច្រើនជាប្រភេទត្រីសតូចៗ ដោយក្នុងមួយថ្ងៃៗរហូតដល់រាប់តោនគីឡូក្រាម ហើយធ្វើសកម្មភាពជាងមួយខែមកហើយ ពុំមានអាជ្ញាធរណាម្នាក់ចេញមកទប់ស្កាត់ឡើយ។
ប្រជាពលរដ្ឋនៅក្នុងតំបន់ដែននេសាទនោះរៀបរាប់ថា ជនជាតិវៀតណាម ចូលមកធ្វើនេសាទត្រីដោយទូក និងកាណូត ហើយប្រើឧបករណ៍ស្បៃមុងក្រឡាញឹករាប់រយម៉ែត្រ យកទៅដាក់ពាំងនៅតំបន់ទឹកហូរសំខាន់ៗចំនួន ៤កន្លែង គឺនៅព្រែកអូតាំងលូ ស្ថិតនៅភូមិតាទៃ និងភូមិអូតាំងលូ នៃឃុំកោះសំពៅ ស្រុកពាមជរ ខេត្តព្រៃវែង។
ប្រជាពលរដ្ឋម្នាក់រស់នៅភូមិព្រែកក្របៅ ឃុំព្រែកក្របៅ ស្រុកពាមជរ គឺលោក ឡោ សុខា ឲ្យដឹងនៅថ្ងៃទី១៤ សីហា ថា អ្នកនេសាទជនជាតិវៀតណាម ទាំងនោះ ធ្វើសកម្មភាពក្នុងមួយក្រុមមានគ្នាប្រមាណពី ៤ ទៅ ៦នាក់ ហើយក្នុងមួយក្រុមៗមានទូក និងកាណូតសម្រាប់ដឹកត្រីយកទៅលក់នៅប្រទេសវៀតណាម រៀងៗខ្លួន។ លោកបន្តថា ត្រីដែលពួកគេនេសាទនោះ ជាប្រភេទត្រីសល្អិត ដោយក្នុងមួយក្រុមយ៉ាងហោចណាស់ពី ១តោនទៅ ១តោនកន្លះក្នុងមួយថ្ងៃ។
លោកថា ការនេសាទរបស់ជនជាតិវៀតណាម នេះ ពុំមានអាជ្ញាធរណាមួយចេញមុខមកទប់ស្កាត់នោះទេ ហើយបញ្ហានេះ ប្រសិនបើបណ្ដោយឲ្យធ្វើសកម្មភាពទៅមុខបានដោយសេរីទៀតនោះ ត្រីទាំងតូចធំ នឹងហិនហោចអស់គ្មានសល់ជាពុំខាន៖ «ក្នុងនាមខ្ញុំជាប្រជាពលរដ្ឋ ខ្ញុំព្រួយបារម្ភថាទៅអនាគតហ្នឹង គឺពុំមាន អឺ! ត្រីណាដែលអាចភ្ញាស់កូន ឬពងកូនបានទេ។ បើខ្មែរយើងតិចតួចដាក់ខុសច្បាប់បន្តិច គឺរដ្ឋបាលជលផល ក៏ដូចជាអធិការប៉ូលិសអីហ្នឹងបង្ក្រាប។ ដល់ពេលបទល្មើសធំៗអ៊ីចឹងទៅ មិនដែលឃើញអ្នកណាមកបង្ក្រាបបានទេ គឺអឺ! តំបន់ឃុំកោះសំពៅ ហ្នឹងជាទូទៅ គឺត្រូវគ្នាពីលើរហូតទៅក្រោមហ្នឹងតែហ្មង។ បារម្ភ អនាគត គឺគ្មានត្រីសម្រាប់បន្តពូជ»។
ឆ្លើយតបនឹងបញ្ហានេះ ប្រធានខណ្ឌសង្កាត់រដ្ឋបាលជលផលស្រុកពាមជរ លោក ពិន ចាន់ ថ្លែងបដិសេធថា អ្នកនេសាទទាំងនោះពុំមែនជាជនជាតិវៀតណាម ទេ គឺជាក្រុមអ្នកនេសាទរបស់សហគមន៍នៅតំបន់នោះ ហើយពួកគេធ្វើនេសាទត្រី ដើម្បីលក់ដោះស្រាយការខ្វះខាតក្នុងសហគមន៍៖ «គេជួលកម្មករ អាហ្នឹងគេជួលកម្មករមិនមែនវៀតណាម អ្នកដាក់ទេ គេយកចំណូលមកកសាងសហគមន៍ហ្នឹងណាស់។ កាលហ្នឹងសហគមន៍គេមានច្បាប់ទម្លាប់ពីលើមកដែរណាស់បងណាស់»។
ទោះជាយ៉ាងនេះក្ដី អ្នកភូមិបញ្ជាក់ថា ជនជាតិវៀតណាម ធ្វើនេសាទបានដោយសារមានភ្លើងខៀវពីអាជ្ញាធរពាក់ព័ន្ធដែលគ្រប់គ្រងតំបន់នោះ។
ចំណែកឯអភិបាលស្រុកពាមជរ គឺលោក សៅ ពិសិដ្ឋ លោកពុំមានប្រតិកម្មអ្វីទៅលើការធ្វើនេសាទរបស់ជនជាតិវៀតណាម ដែលប្រជាពលរដ្ឋលើកឡើងនោះទេ ដោយគ្រាន់តែបញ្ជាក់ថា បញ្ហានេះលោកបានបញ្ជាទៅអាជ្ញាធរឃុំឲ្យដោះស្រាយរួចទៅហើយ៖ «អឺ! បញ្ជាពីស្រុកមកឲ្យសាអស់ហើយ ប៉ុន្តែបើអស់មិនអស់យ៉ាងម៉េច ឲ្យសួរទៅខាងឃុំមើល ព្រោះខ្ញុំបញ្ជាទៅអស់ហើយ»។
ទាក់ទងនឹងបញ្ហានេះដែរ ប្រធានអង្គការសម្ព័ន្ធភាពដើម្បីអភិរក្សធនធានជលផល លោក ឱម សាវ៉ាត មានប្រសាសន៍ថា នៅរដូវវស្សាចាប់ពីខែកក្កដា ដល់ខែកញ្ញា ជារដូវហាមឃាត់ការធ្វើនេសាទដោយប្រើឧបករណ៍ក្រឡាញឹក ជាពិសេស គឺនេសាទចាប់កូនត្រីតែម្ដង។ លោកថា ការចាប់កូនត្រីក្នុងរដូវហាមឃាត់នេះ ធ្វើឲ្យប៉ះពាល់ធ្ងន់ធ្ងរដល់ចំនួនមច្ឆជាតិនៅថ្ងៃខាងមុខ៖ «បារម្ភណាស់កន្លែងហ្នឹង ដែលយើងចូលរួមចំណែកផ្សព្វផ្សាយទៅដល់សហគមន៍ទៅដល់អឺ! បងប្អូនអ្នកនេសាទយើងឲ្យគាត់យកចិត្តទុកដាក់ ដើម្បីធ្វើយ៉ាងណាក្នុងរដូវបិទនេសាទ យើងកុំឲ្យចាប់កូនត្រីវានឹងខាតបង់។ យើងដឹងហើយណាស់ កូនត្រីមួយតោនវាមានរាប់លានក្បាល ប៉ុន្តែបើត្រីធំត្រីដែលយើងអាចចាប់មកបរិភោគបាន វាអាដែងអឺ! ចំនួនក្បាលហ្នឹងវាតិចជាង»។
1 comment:
នាក់ណាវាហ៊ាន វាអស់បុណ្យវ៉ើយ
Post a Comment