ព្រះមហាក្សត្រសម្ដេចព្រះបរមនាថ នរោត្ដម សីហមុនី ក្នុងឱកាសយាងចូលរួមជារាជាធិបតីក្នុងពិធីបើកកិច្ចប្រជុំសភានីតិកាលទី៥ ដំបូង កាលពីថ្ងៃទី២៣ កញ្ញា ឆ្នាំ២០១៣។
RFA/Keo Nimol
ឧត្តមក្រុមប្រឹក្សានៃអង្គចៅក្រម បើកសម័យប្រជុំលើកទី២៥ នៅព្រឹកថ្ងៃទី២១ មករា ក្នុងព្រះបរមរាជវាំង ក្រោមព្រះរាជាធិបតីភាពរបស់ព្រះមហាក្សត្រ ព្រះបាទបរមនាថ នរោត្តម សីហមុនី ដើម្បីសម្រេចការងារមួយចំនួនទាក់ទងការងារតែងតាំង និងផ្លាស់ប្ដូរមន្ត្រីតុលាការខ្លះ។
អង្គប្រជុំរបស់ឧត្តមក្រុមប្រឹក្សានៃអង្គចៅក្រម បានសម្រេចតែងតាំងអនុប្រធានតុលាការកំពូល មួយរូប ប្រធានសាលាដំបូងខេត្តតាកែវ មួយរូប ប្រធានសាលាដំបូងខេត្តត្បូងឃ្មុំ មួយរូប តែងតាំងអនុប្រធានសាលាដំបូងរាជធានីភ្នំពេញ ២រូប និងផ្ទេរភារកិច្ចចៅក្រមមួយចំនួន។
មន្ត្រីតុលាការដែលត្រូវផ្លាស់ប្ដូរផ្ទេរតំណែង រួមមានអនុប្រធានសាលាដំបូងមួយរូប និងចៅក្រម ៣រូបផ្សេងទៀត ត្រូវផ្លាស់ប្ដូរកន្លែងធ្វើការពីខេត្តកណ្ដាល មករាជធានីភ្នំពេញ។ អង្គប្រជុំ បានពិគ្រោះយោបល់ទាក់ទងការងារតែងតាំងអគ្គព្រះរាជអាជ្ញារងតុលាការកំពូល មួយរូប ព្រះរាជអាជ្ញាខេត្តកណ្ដាល មួយរូប ខេត្តត្បូងឃ្មុំ មួយរូប និងពិគ្រោះយោបល់ផ្ទេរមុខតំណែងព្រះរាជអាជ្ញារង ៥រូបផ្សេងទៀត។ ក្រៅពីនោះ មានការលុបឈ្មោះ លោក តុប ច័ន្ទសិរីវុធ អតីតព្រះរាជអាជ្ញាខេត្តពោធិ៍សាត់ ចេញពីបញ្ជីឈ្មោះមន្ត្រីតុលាការ។
អគ្គលេខាធិការឧត្តមក្រុមប្រឹក្សានៃអង្គចៅក្រម លោក សំ ប្រជាមានិត មានប្រសាសន៍នៅថ្ងៃទី២១ មករា ឲ្យដឹងថា អង្គប្រជុំឧត្តមក្រុមប្រឹក្សានៃអង្គចៅក្រមនេះ មានរបៀបវារៈសម័យប្រជុំ៦។ លោកបានថ្លែងថា «អង្គប្រជុំនោះបានសម្រេចទី១ យល់ព្រមទាក់ទងបទបញ្ជាផ្ទៃក្នុងនៃឧត្តមក្រុមប្រឹក្សានៃអង្គចៅក្រម។ ទី២ អង្គប្រជុំបានយល់ព្រមការសុំផ្តាច់ពីមុខងារជាចៅក្រម ឬព្រះរាជអាជ្ញារបស់សមាជិកឧត្តមក្រុមប្រឹក្សានៃអង្គចៅក្រម ៧រូប និងទី៣ អង្គប្រជុំយល់ព្រមលើការសម្រេចលើសេចក្តីព្រាងព្រះរាជក្រឹត្យស្ដីពីក្របខណ្ឌ ឋានន្តរសក្តិ និងថ្នាក់សម្រាប់ចៅក្រម និងព្រះរាជអាជ្ញា និងទី៤ តែងតាំងអនុប្រធានតុលាការកំពូល មួយរូប»។
លោក សំ ប្រជាមានិត មិនបានឲ្យដឹងអំពីឈ្មោះរបស់មន្ត្រីតុលាការដែលត្រូវតែងតាំង និងផ្លាស់ប្ដូរមុខងារ និងផ្លាស់ប្ដូរកន្លែងធ្វើការទេ។
ទាក់ទងការតែងតាំងមន្ត្រីតុលាការ ចៅក្រម និងព្រះរាជអាជ្ញាមួយចំនួននេះ លោក មឿន តុលា ប្រធានកម្មវិធីការងារ និងច្បាប់ នៃមជ្ឈមណ្ឌលច្បាប់សម្រាប់សហគមន៍ (CLEC) មានប្រសាសន៍ថា តុលាការកម្ពុជា គ្មានឯករាជ្យភាពទេ។ ដូច្នេះ លោកគ្មានជំនឿថាការដោះដូរចៅក្រម និងព្រះរាជអាជ្ញានោះ អាចធ្វើឲ្យតុលាការមានឯករាជ្យទេ។ លោកថ្លែងទៀតថា តុលាការកម្ពុជា ត្រូវអ្នកកាន់អំណាច ប្រើប្រាស់ជាឧបករណ៍នយោបាយ៖ «មួយទៀត គឺច្បាប់គ្រប់គ្រងចៅក្រម ព្រះរាជអាជ្ញា គឺច្បាប់៣ ដែលបានអនុម័តនោះ គឺអនុម័តដោយតក់ក្រហល់ និងគ្មានការបើកឲ្យមានការពិភាក្សាទូលំទូលាយទេ»។
ឧត្តមក្រុមប្រឹក្សានៃអង្គចៅក្រម មានព្រះមហាក្សត្រជាព្រះប្រធាន និងមានសមាជិក ១១រូប ដែលរួមមានជាអាទិ៍ រដ្ឋមន្ត្រីក្រសួងយុត្តិធម៌ ប្រធានតុលាការកំពូល អគ្គព្រះរាជអាជ្ញាអមតុលាការកំពូល សមាជិកមួយរូបជ្រើសតាំងដោយព្រឹទ្ធសភា សមាជិកមួយរូបជ្រើសតាំងដោយរដ្ឋសភា សមាជិកមួយរូបជ្រើសតាំងដោយក្រុមប្រឹក្សាធម្មនុញ្ញ និងសមាជិកផ្សេងៗទៀតជ្រើសរើសដោយចៅក្រម និងព្រះរាជអាជ្ញា។
អង្គប្រជុំរបស់ឧត្តមក្រុមប្រឹក្សានៃអង្គចៅក្រម អាចទុកជាបានការបាន លុះត្រាតែមានសមាជិកយ៉ាងតិច ៦រូបចូលរួម។ ច្បាប់ថ្មីស្ដីពីការរៀបចំ និងការប្រព្រឹត្តទៅនៃឧត្តមក្រុមប្រឹក្សានៃអង្គចៅក្រម ត្រូវរដ្ឋសភាអនុម័តកាលពីថ្ងៃទី២៣ ខែឧសភា ឆ្នាំ២០១៤ នៅក្នុងពេលនោះតំណាងរាស្ត្រមកពីគណបក្សសង្គ្រោះជាតិ មិនបានចូលរួមប្រជុំ ដើម្បីពិភាក្សា និងអនុម័តច្បាប់នេះទេ៕
2 comments:
I see in the picture , this king is surround by Vietnamese faces . Did he is Yuon king or Khmer traitor ?
Ah chhke sdach ning mi slett men sam an
Post a Comment