ដោយ៖ អុិត សូធឿត | ថ្ងៃពុធ ទី21 មករា 2015,
អ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជាលោក សូរិយា ប្រាសាទស៊ូប៊ែឌី បានលើកឡើងពីបញ្ហានិទណ្ឌភាពក្នុងករណីបាញ់សម្លាប់កម្មករនៅផ្លូវវ៉េងស្រេង កាលពីដើមខែមករា ឆ្នាំ២០១៤ ទៅពិភាក្សាជាមួយរដ្ឋមន្ត្រីក្រសួងមហាផ្ទៃ ។
ថ្លែងទៅកាន់អ្នកសារព័ត៌មានបន្ទាប់ពីចូលជួបជាមួយលោក ស ខេង រដ្ឋមន្ត្រីក្រសួងមហាផ្ទៃ នៅរសៀលថ្ងៃពុធនេះ លោក ស៊ូប៊ែឌី មានប្រសាសន៍ថា លោកបានសាកសួរទៅកាន់លោក ស ខេង ពីការវិវឌ្ឍនៃការស៊ើបអង្កេតលើករណីហិង្សានៅផ្លូវវ៉េងស្រេងកាលពីដើមខែមករា ឆ្នាំ២០១៤ ដែលបានសម្លាប់មនុស្ស៥នាក់ និងមួយចំនួនទៀតរងរបួស ។
លោក ស៊ូប៊ែឌី មិនបានបញ្ជាក់ពីការឆ្លើយតបរបស់លោក ស ខេង យ៉ាងណាទេ តែលោកថាលោកមានការពេញចិត្តនឹងលទ្ធផលនៃកិច្ចប្រជុំជាមួយលោក ស ខេង នៅថ្ងៃនេះ ដោយលោកអះអាងថា លោកទទួលបានការឆ្លើយតបដែលមានភាពស្មោះត្រង់ ហើយរដ្ឋមន្ត្រីក្រសួងមហាផ្ទៃបានផ្ដល់នូវព័ត៌មានមានសារៈប្រយោជន៍មួយចំនួនដល់លោក ហើយលោកនឹងបន្តធ្វើការជាមួយព័ត៌មានទាំងនេះបន្តទៀត ។
នៅក្នុងកិច្ចប្រជុំនេះ លោក ស៊ូប៊ែឌី ក៏បានពិភាក្សាពីការកែទម្រង់ការបោះឆ្នោត និងបញ្ហាសង្គមជាច្រើនទៀតផងដែរ ដែលរួមមានទាំងករណីជនភៀសខ្លួនម៉ុងតាញ៉ា ករណីឃុំខ្លួនព្រះសង្ឃ សកម្មជនគណបក្សសង្គ្រោះជាតិ និងសកម្មជនដីធ្លី ។
គេហទំព័ររបស់អគ្គស្នងការដ្ឋាននគរបាលជាតិ បានចុះផ្សាយថាលោក ស ខេង បានឆ្លើយតបទៅកាន់លោកស៊ូប៊ែឌីពីបញ្ហានិទណ្ឌភាពថារដ្ឋាភិបាលកម្ពុជាបានជំរុញឲ្យបញ្ចប់បញ្ហានិទណ្ឌភាព ហើយកន្លងមកនេះ ជនល្មើសជាច្រើន ដែលព្យាយាមគេចខ្លួនត្រូវបានអាជ្ញាធរយកមកផ្ដន្ទាទោស ។
គួររំឮកថា នៅពេលជាប់គាំងនយោបាយ មានការប៉ះទង្គិចគ្នារវាងកម្មករ និងសមត្ថកិច្ចនៅផ្លូវវ៉េងស្រេង បណ្តាលឲ្យកម្មករ៥នាក់ស្លាប់ ១នាក់បាត់ខ្លួន និងប្រមាណ៤០នាក់ផ្សេងទៀតរងរបួស នៅពេលធ្វើការតវ៉ាដំឡើងប្រាក់ឈ្នួល ។ រីឯហិង្សានៅមុខស្ពានស្ទឹងមានជ័យរវាងសមត្ថកិច្ច និងកម្មករខណៈនោះសមត្ថកិច្ចបានបាញ់បង្ក្រាបកម្មករបណ្តាលឲ្យអ្នកលក់បាយម្នាក់ស្លាប់នៅនឹងកន្លែងកើតហេតុ ។ ចំណែកហិង្សារវាងសមត្ថកិច្ច និងក្រុមអ្នកគាំទ្របក្សសង្គ្រោះជាតិបាតុកម្មទាមទារឲ្យមាន ការបោះឆ្នោតឡើងវិញ កាលពីចុងឆ្នាំ២០១៣ នៅជិតស្ពានក្បាលថ្នល់ បណ្តាលឲ្យបុរសម្នាក់ឈ្មោះ ម៉ៅ សុចាន់ ស្លាប់ តែករណីទាំងអស់នោះតុលាការមិនទាន់វែកមុខជនដៃដល់មកផ្តន្ទាទោសនៅឡើយ គឺចាប់តែបាតុករ២៣នាក់ទៅដាក់គុកមួយរយៈ ៕
សូមសរសេរមកលោក អុិត សូធឿត តាមរយៈ sothoeuth@vodhotnews.com
No comments:
Post a Comment