Tue, 19 May 2015 ppp
មាស សុខជា
 |
| លោក កឹម សុខា ជួបសំណេះសំណាលជាមួយប្រជាពលរដ្ឋនៅក្រុងកែប កាលពីម្សិលមិញ។ រូបថត ដកចេញពីហ្វេសហ៊ុក កឹម សុខា |
កំពតៈ អនុប្រធានគណបក្សសង្គ្រោះជាតិលោក កឹម សុខា បានថ្លែងកាលពីម្សិលមិញថា គណបក្សកាន់អំណាចកំពុងព្យាយាមយ៉ាងសកម្មដើម្បីបំបែកបំបាក់គណបក្សប្រឆាំង ដោយប្រៀបធៀបស្ថានភាពនេះទៅនឹងការតស៊ូនយោបាយត្រីភាគីនៅតាមបណ្តោយព្រំដែនថៃក្នុងអំឡុងចុងទសវត្សរ៍ ៨០ និងដើមទសវត្សរ៍ ៩០ ។
ថ្លែងទៅកាន់អ្នកគាំទ្ររាប់រយនាក់ក្នុងក្រុងកំពត លោក កឹម សុខា បានសន្និដ្ឋានថា គណបក្សប្រជាជនកម្ពុជាកាលពីអតីតកាល បានព្យាយាមបំបែកការប្រកួតប្រជែងនយោបាយនៅក្នុងប្រទេសកម្ពុជាដើម្បីធ្វើការត្រួតត្រា។
លោកបានសំដៅទៅព្រឹត្តិការណ៍ដែលបាននាំឲ្យមានកិច្ចព្រមព្រៀងសន្តិភាពទីក្រុងប៉ារីសខែតុលា ឆ្នាំ ១៩៩១ ដែលក្នុងនោះក្រុមប្រឆាំងបី ខ្មែរក្រហម គណបក្សហ៊្វុនស៊ិនប៉ិច និងរណសិរ្សជាតិរំដោះប្រជាពលរដ្ឋខ្មែរគឺស្ថិតនៅក្នុងសម្ព័ន្ធប្រឆាំងលោក ហ៊ុន សែន ប៉ុន្តែនៅទីបំផុតបាត់បង់អំណាច។
លោកបានថ្លែងថា៖ «គូប្រកួតប្រជែងរបស់យើងបានទទួលជោគជ័យក្នុងអតីតកាលដោយសារតែយុទ្ធសាស្រ្តបំបែកបំបាក់ដើម្បីត្រួតត្រា»។ «យើងបានស្គាល់យុទ្ធសាស្រ្តរបស់ពួកគេរួចហើយ ហើយពួកគេចង់បំបែកបំបាក់យើង ពីព្រោះប្រសិនបើក្រុមរបស់យើងបែកបាក់ យើងទន់ខ្សោយណាស់»។
លោកបានបន្ថែមថា បន្ទាប់ពីកិច្ចព្រមព្រៀងទីក្រុងប៉ារីសឆ្នាំ ១៩៩១ ពួកគេបានជោគជ័យ ទៅលើក្រុមចម្រុះទាំងនោះដែលនាំឲ្យគណបក្សកាន់អំណាចអាចឈានទៅគ្រប់គ្រងស្ថានការណ៍បាន។
លោកថ្លែងបន្តថា៖ «ឥឡូវនេះពួកគេព្យាយាមបំបែកបំបាក់ប្រធានគណបក្សសង្គ្រោះជាតិ លោកសម រង្ស៊ី ពី កឹម សុខា»។
លោកបញ្ជាក់ថា៖ «អ្នកខ្លះគិតថា ឥឡូវនេះ លោក សម រង្ស៊ី ខុសពី កឹម សុខា... សម រង្ស៊ី និងកឹម សុខា គឺតែមួយ ហើយគោលដៅតែមួយគឺដើម្បីសង្គ្រោះជាតិ»។
ជាការឆ្លើយតបនឹងសម្តីរបស់លោក កឹម សុខា អ្នកនាំពាក្យគណបក្សប្រជាជនកម្ពុជា លោក សុខ ឥសាន បានថ្លែងថា គណបក្សរបស់លោកមិនបានប្រើល្បិច ឬយុទ្ធសាស្រ្តបំបែកបំបាក់សម្រាប់ហេតុផលនយោបាយនោះទេ។
លោក ឥសាន បានថ្លែងបន្តថា៖ «កត្តាសំខាន់មិនកំណត់ដោយកម្លាំងខាងក្រៅទេ។ វាអាស្រ័យទៅលើការធ្វើការងារផ្ទៃក្នុងនៃបក្សនីមួយៗដើម្បីមើលថាតើវាបែកបាក់ដោយខ្លួនឯងឬអត់?»។
លោកបានបន្ថែមថា គណបក្សសង្គ្រោះជាតិ ក៏បានព្យាយាមបំបែកបំបាក់គណបក្សដទៃយ៉ាងសកម្មផងដែរ។
អ្នកនាំពាក្យគណបក្សហ៊្វុនស៊ិនប៉ិចលោក ញ៉េប ប៊ុនជិន បានបដិសេធធ្វើអត្ថាធិប្បាយ៕
No comments:
Post a Comment