2015-07-13 rfa
អង្គការសមាគមលើកបដាមិនគាំទ្រសេចក្ដីព្រាងច្បាប់គ្រប់គ្រង
អង្គការ-សមាគម នៅមុខវិមានរដ្ឋសភា នៅថ្ងៃទី១៣ ខែកក្កដា ឆ្នាំ២០១៥។
RFA/Uon Chhin
|
ក្រុមអង្គការមិនមែនរដ្ឋាភិបាល សហគមន៍ដែលមានទំនាស់ដីធ្លី និងសហជីព បានប្ដេជ្ញាថានឹងបន្តយុទ្ធនាការប្រឆាំងច្បាប់ស្ដីពីសមាគម និងអង្គការមិនមែនរដ្ឋាភិបាលបន្តទៀត។ ច្បាប់នេះ ត្រូវបានក្រុមឃ្លាំមើលសិទ្ធិមនុស្សជាតិ និងអន្តរជាតិ ចាត់ទុកថាជាការរឹតបន្តឹង និងធ្វើដើម្បីបំបិទសិទ្ធិសេរីភាពធ្ងន់ធ្ងរចំពោះសង្គមស៊ីវិលនៅកម្ពុជា។
តាំងពីព្រឹកព្រលឹមស្រាងៗថ្ងៃទី១៣ កក្កដា ផ្លូវថ្នល់ស្ទើរគ្រប់ច្រកល្ហកក្នុងទីក្រុងភ្នំពេញ ដែលមនុស្សម្នាធ្លាប់ចេញចូល និងឆ្លងកាត់សំដៅមករដ្ឋសភា ត្រូវបិទជិតមិនអនុញ្ញាតឲ្យអ្នកធ្វើដំណើរបានធ្វើចរាចរដូចមុនទៀតឡើយ គឺពេលនេះ ត្រូវហ៊ុមព័ទ្ធដោយកម្លាំងចម្រុះ និងរបាំងការពារយ៉ាងតឹងរ៉ឹងវិញ។
ការរឹតបន្តឹងនេះ ស្របពេលសមាជិកសភាដែលមានតែគណបក្សប្រជាជនកម្ពុជា កំពុងប្រជុំអនុម័តសេចក្ដីព្រាងច្បាប់សមាគម និងអង្គការមិនមែនរដ្ឋាភិបាល នៅក្នុងមន្ទីររដ្ឋសភា។ ចំណែកនៅខាងក្រៅបរិវេណនៃរដ្ឋសភាឯណេះវិញ របាំងដែកត្រូវបានដាក់ការពារជាច្រើនជាន់ អមដោយកម្លាំងសមត្ថកិច្ចដែលមានដំបងឆក់ និងខែលគ្រប់ដៃថែមទៀតផង។
ក្រុមអ្នកតវ៉ាដែលមានគ្នាប្រមាណ ២០០នាក់ ហើយថែមទាំងពុំមានអ្វីទាល់តែសោះក្នុងដៃ ក្រៅពីបដាសរសេរថា និយាយថាទេច្បាប់សមាគម និងអង្គការមិនមែនរដ្ឋាភិបាលផងនោះ បានត្រឹមឈរតវ៉ានៅខាងក្រៅ ដែលមានចម្ងាយប្រហែល ៥០០ម៉ែត្រពីរដ្ឋសភាប៉ុណ្ណោះ។
មន្ត្រីផ្នែកគណនេយ្យនៃសហព័ន្ធសជីពកម្មករ ចំណីអាហារ និងសេវាកម្មកម្ពុជា កញ្ញា ញូង សុខហៀង ឲ្យដឹងកាលពីព្រឹកថ្ងៃទី១៣ កក្កដា ថា ក្រុមសហជីព អង្គការ និងសមាគម នឹងបន្តយុទ្ធនាការបន្តទៀតប្រឆាំងច្បាប់អង្គការ និងសមាគមនេះ បើទោះជាត្រូវបានរដ្ឋសភាអនុម័តហើយក្ដី។ កញ្ញា សុខហៀង បន្តថា ព្រោះច្បាប់នេះអនុម័តរួចហើយពុំបានបម្រើឲ្យផលប្រយោជន៍រួម ក្រៅពីដើម្បីបំពេញតម្រូវការសម្រាប់គោលនយោបាយរបស់គណបក្សកាន់អំណាចប៉ុណ្ណោះនោះ។ កញ្ញា ញូង សុខហៀង បន្តថា «ពួកខ្ញុំមិនបញ្ឈប់ទេ ទៅដល់ណាក៏ទៅដែរ លុះត្រាតែប្រកាសពីគាត់មកថា ច្បាប់នេះអនុវត្តមកដើម្បីប្រជាពលរដ្ឋ ហើយត្រូវកែមាត្រា និងលក្ខន្តិកៈមួយចំនួនដែលប្រជាពលរដ្ឋស្នើសុំ»។
បើទោះជាបែបណា មន្ត្រីទទួលបន្ទុកកិច្ចការដាក់បម្រាម និងរបាំងការពាររបស់រដ្ឋាភិបាលនៅបរិវេណរដ្ឋសភា បដិសេធមិនធ្វើអត្ថាធិប្បាយជុំវិញការរឹតបន្តឹងសន្តិសុខក្នុងថ្ងៃអនុម័តច្បាប់នេះឡើយ។
រស់នៅស្រុកបរិបូរណ៍ ខេត្តកំពង់ឆ្នាំង លោកស្រី យិន បិច ដែលបានចូលរួមធ្វើយុទ្ធនាការប្រឆាំងការអនុម័តច្បាប់ស្ដីពីសមាគម និងអង្គការមិនមែនរដ្ឋាភិបាលនេះដែរ ចាត់ទុកថា តំណាងរាស្ត្រសុទ្ធតែបានអះអាងថា ធ្វើអ្វីៗដើម្បីរាស្ត្រ ក៏ប៉ុន្តែផ្ទុយទៅវិញ ពេលបានអំណាចក្នុងដៃហើយ គឺពុំបានអនុវត្តជាក់ស្ដែងដូចការសន្យាឡើយ។ លើសពីនេះទៀត ថែមទាំងបានព្យាយាមបង្កើតច្បាប់នានាដែលពុំបានបម្រើឲ្យផលប្រយោជន៍សាធារណៈ ក្រៅពីដើម្បីបក្ស និងការពារផលប្រយោជន៍បុគ្គលច្រើនជាងទៅវិញប៉ុណ្ណោះ។ លោកស្រី យិន បិច ព្រមានថា បើគណបក្សនយោបាយណាដែលបន្តអនុម័តច្បាប់នេះ អាចនឹងប្រឈមបាត់បង់ការជឿទុកចិត្ត និងធ្លាក់ចុះប្រជាប្រិយភាព។ លោកស្រី យិន បិច បន្តថា «បើនិយាយពីតំណាងរាស្ត្រក៏កើតចេញពីរាស្ត្រ ហើយស៊ីប្រាក់ខែក៏បានលុយពីរាស្ត្រដែរ ប៉ុន្តែមុននឹងបង្កើតច្បាប់ គួរតែពិគ្រោះយោបល់ជាមួយរាស្ត្រ»។
លោក នី ចរិយា មន្ត្រីជាន់ខ្ពស់សមាគមការពារសិទ្ធិមនុស្សអាដហុក (Adhoc) យល់ឃើញថា ការបន្តអនុម័តច្បាប់ស្ដីពីសមាគម និងអង្គការមិនមែនរដ្ឋាភិបាលនេះ ទំនងជារដ្ឋាភិបាលចាត់ទុកថា ខ្លួនត្រូវបាត់បង់សំឡេងឆ្នោតដែលពុំធ្លាប់មាន ព្រោះតែអង្គការសង្គមស៊ីវិលហើយមើលទៅ។ លោក នី ចរិយា ថ្លែងបន្តថា ប្រសិនបើយ៉ាងដូច្នេះមែន នោះបានន័យថា ការយល់ឃើញរបស់រដ្ឋាភិបាលអាចនឹងរុញច្រានស្ថានភាពនេះឲ្យកាន់តែធ្ងន់ធ្ងរមួយកម្រិតថែមទៀត។ លោក នី ចរិយា ប្រៀបធៀបថា ការបាត់បង់សំឡេងឆ្នោតរបស់គណបក្សរាជានិយមហ៊្វុនស៊ិនប៉ិច គឺពុំមានជាប់ទាក់ទិននឹងសកម្មភាពរបស់អង្គការក្រៅរដ្ឋាភិបាលឡើយ។ ហេតុនេះ ការធ្លាក់ចុះសំឡេងគាំទ្រគណបក្សប្រជាជនកម្ពុជា កន្លងទៅនេះ ក៏ពុំមានមន្ទិលសង្ស័យណាមួយជាមួយនឹងអង្គការមិនមែនរដ្ឋាភិបាលនោះទេ។ លោកបន្តថា «គាត់ភ្លេចគិតថាសង្គមស៊ីវិលឥតមានធ្វើឲ្យគាត់បាត់បង់សន្លឹកឆ្នោតឆ្នាំ២០១៣ ទេ គឺខ្លួនគាត់ផ្ទាល់ទេធ្វើឲ្យបាត់បង់សន្លឹកឆ្នោតឆ្នាំ២០១៣។ យើងសួរថា បើសិនជាសង្គមស៊ីវិលធ្វើឲ្យបាត់បង់សន្លឹកឆ្នោតឆ្នាំ២០១៣ ចុះកាលដែលគណបក្សហ៊្វុនស៊ិនប៉ិច ពីឈ្នះរហូតទៅដល់ចាញ់បាត់សំឡេងសុទ្ធហ្នឹង មកពីសង្គមស៊ីវិលដែរឬក៏ម៉េច?»។
បើទោះជាមានពង្រាយកម្លាំងដ៏ច្រើនជុំវិញបរិវេណរដ្ឋសភា អមដោយឡានទឹកជាច្រើនគ្រឿងបែបណា ក៏ការតវ៉ាកាលពីព្រឹកថ្ងៃទី១៣ កក្កដា ពុំមានការប៉ះទង្គិចដោយហិង្សារវាងក្រុមសមត្ថកិច្ច និងក្រុមអ្នកតវ៉ាដែរ៕
No comments:
Post a Comment