ដោយ៖ ស៊ុន ណារិន | ថ្ងៃព្រហស្បតិ៍ ទី23 កក្កដា 2015,
ប្រធានគណបក្សសង្រ្គោះជាតិ លោក សម រង្ស៊ី
ប្រធានគណបក្សសង្រ្គោះជាតិ លោក សម រង្ស៊ី នៅថ្ងៃព្រហស្បតិ៍នេះចាត់ទុកថាវត្តមានរបស់លោកនៅក្រៅប្រទេស មិនមែនមានន័យថាលោកមិនយកចិត្តទុកដាក់ចំពោះសកម្មជនទាំង១១នាក់ដែលត្រូវបានតុលាការផ្តន្ទាទោសនោះទេ ប៉ុន្តែថាវត្តមានរបស់លោកក្នុងប្រទេសមិនមែនតែងតែចាំបាច់រហូតនោះទេ។
លោក សម រង្ស៊ី បានលើកឡើងបែបនេះជាការឆ្លើយតបនឹងការរិះគន់មួយចំនួនថាមូលហេតុអ្វីបានជាលោកចេញទៅក្រៅប្រទេស ខណៈសកម្មជនកំពុងតែមានបញ្ហា។
កាលពីថ្ងៃអង្គារ សាលាដំបូងរាជធានីភ្នំពេញបានផ្ដន្ទាទោសលោក មាជ សុវណ្ណារ៉ានិងសកម្មជនគណបក្សសង្គ្រោះជាតិ១០នាក់ផ្សេងទៀតឲ្យជាប់ពន្ធនាគារពី៧ឆ្នាំទៅ២០ឆ្នាំ ពីបទដឹកនាំនិងចូលរួមក្នុងចលនាកុប្បកម្មនាំឲ្យមានហិង្សានៅក្បែរទីលានប្រជាធិបតេយ្យកាលពីឆ្នាំ២០១៤។
តាមរយៈលិខិតមួយដែលចេញផ្សាយនៅថ្ងៃនេះ លោក សម រង្ស៊ី បានលើកឡើងថាគម្រោងទៅប្រទេសបារាំង លោកបានត្រៀមជាច្រើនសប្តាហ៍មកហើយ ដោយរង់ចាំការត្រឡប់មកក្នុងប្រទេសវិញរបស់លោក កឹម សុខា អនុប្រធានគណបក្សសង្រ្គោះជាតិ កាលពីទី២០ខែកក្កដា។ លោកបន្តថាថ្នាក់ដឹកនាំរបស់គណបក្សសង្រ្គោះជាតិបានប្រតិកម្មភ្លាមនៅពេលដឹងថាមានការផ្តន្ទាទោសកម្មជនទាំង១១នាក់។ លោកបន្តថាលោកមានសហសេវិករបស់លោកក្នុងប្រទេសសម្រាប់ផ្តល់ព័ត៌មានទាក់ទងនឹងការចាប់ខ្លួនសកម្មជនរបស់គណបក្ស។
លោក សម រង្ស៊ី បានបញ្ជាក់នៅក្នុងលិខិតជាភាសាអង់គ្លេសថា៖"វត្តមានរបស់ខ្ញុំនៅក្នុងប្រទេសមិនមែនតែងតែចាំបាច់នៅចំពោះមុខលំនាំនៃការគាបសង្កត់ដែលមនុស្សភាគច្រើនបានដឹងនោះទេ។ ជួនកាលវាអាចមានប្រសិទ្ធភាពជាង នៅពេលខ្ញុំនៅក្រៅប្រទេស ដើម្បីការពារគោលការណ៍នៃលទ្ធិប្រជាធិបតេយ្យ។ ខ្ញុំមានសហសេវិករបស់ខ្ញុំដែលខ្ញុំជឿជាក់ទាំងស្រុងសម្រាប់ការចែករំលែកការងារ"។
លោក សម រង្ស៊ី បន្តថានឹងមានសកម្មភាព និងវិធានការសមរម្យផ្សេងៗ ដែលគណបក្សនឹងធ្វើចំពោះមុខនៅប៉ុន្មានថ្ងៃខាងមុខនេះ។ លោកបានបញ្ជាក់លើជំហរវប្បធម៌សន្ទនាថា៖”យើងជឿជាក់ថាវប្បធម៌សន្ទនានិងការរិះគន់អាចនៅជាមួយគ្នាបាន ដរាបណាដែលដៃគូសន្ទនានៅតែរក្សាការគោរពគ្នាទៅវិញទៅមក។ វប្បធម៌នៃការសន្ទនាមិនមែនអនុវត្តសម្រាប់ផលប្រយោជន៍ខ្លួនឯងនោះទេ។ វាជាដំណើរការមួយដែលបម្រើគោលបំណងសំខាន់ៗជាមួយឥទ្ធិពលធំធេង រួមមានការបញ្ចប់វប្បធម៌ហិង្សានិងការគុំគួននិងការធានានូវការផ្លាស់ប្តូរក្នុងលទ្ធិប្រជាធិបតេយ្យដោយសន្តិវិធីសម្រាប់កម្ពុជា”។
លោក សម រង្ស៊ី ឲ្យដឹងទៀតថាដំណើរការនៃវប្បធម៌សន្ទនានៅថ្មីនិងផុយស្រួយនៅឡើយ ប៉ុន្តែថាវានឹងបញ្ជាក់ពីសារសំខាន់នៃអនាគតលទ្ធិប្រជាធិបតេយ្យនៅក្នុងប្រទេសកម្ពុជា។
លោក សម រង្ស៊ី បញ្ជាក់ថាប្រសិនបើគ្មានវប្បធម៌សន្ទនានោះទេ ការគាបសង្កត់នឹងកាន់តែអាក្រក់ជាងនេះ ដោយមិនមានការដោះលែងសកម្មជនកាលពីខែមេសា ឆ្នាំ២០១៥ ហើយនឹងមានការចាប់ខ្លួនមនុស្សបន្ថែមទៀត ដោយសារអំពើហិង្សាមុនថ្ងៃទី២២ខែកក្កដា ឆ្នាំ២០១៤។
កាលពីថ្ងៃពុធ អនុប្រធានគណបក្សសង្រ្គោះជាតិ លោក កឹម សុខា អះអាងថាលោកកំពុងរកដំណោះស្រាយ ដើម្បីឲ្យមានការដោះលែងសកម្មជននិងមន្រ្តីគណបក្សសង្រ្គោះជាតិទាំង១១រូបដែលត្រូវបានតុលាការផ្តន្ទាទោស។ លោក កឹម សុខា សរសេរនៅលើហ្វេសប៊ុករបស់លោកនៅថ្ងៃពុធនេះថា៖"នៅថ្ងៃទី២២ ខែកក្កដា ឆ្នាំ២០១៥ លោក កឹម សុខា ក្នុងតួនាទីជាមេដឹកនាំគណបក្សសង្គ្រោះជាតិ កំពុងស្វះស្វែងរិះរកមធ្យោបាយជួយដល់សកម្មជនគណបក្សសង្គ្រោះជាតិទាំង១១រូប ដែលត្រូវបានតុលាការផ្ដន្ទាទោសជាប់ពន្ធនាគារកាលពីថ្ងៃម្សិលមិញ ដោយថ្ងៃនេះ លោក កឹម សុខា ជួបជាមួយមន្ត្រីទូតនៅស្ថានទូតយ៉ាងតិចចំនួន៣ ក្នុងទីក្រុងភ្នំពេញ”។
គណបក្សសង្រ្គោះជាតិបានចេញសេចក្តីថ្លែងការណ៍មួយដោយចាត់ទុកការផ្តន្ទាទោសមន្រ្តីនិងសកម្មជនគណបក្សសង្រ្គោះជាតិទាំង១១នាក់ជាការរំលោភលើកិច្ចព្រមព្រៀងនយោបាយដែលគណបក្សទាំងពីរបានឯកភាពគ្នា។ សេចក្តីថ្លែងការណ៍បញ្ជាក់ថា៖"គណបក្សសង្រ្គោះជាតិសង្ឃឹមថាវប្បធម៌សន្ទនានឹងអាចបន្តដោះស្រាយនូវបញ្ហារបស់ប្រទេសជាតិ និងប្រជាពលរដ្ឋខ្មែរជាពិសេសនឹងបញ្ចប់នូវភាពតានតឹងនយោបាយ រួមទាំងសហការគ្នាធ្វើឲ្យមានការដោះលែងសកម្មជនគណបក្សសង្រ្គោះជាតិ ទាំង១១រូបនេះ ឲ្យមានសេរីភាពឡើងវិញ”។
គួរបញ្ជាក់ថា ក្រោយហិង្សាក្បែរទីលានប្រជាធិបតេយ្យកាលពីឆ្នាំ២០១៤ លោក មាជ សុវណ្ណារ៉ា និងសកម្មជនគណបក្សសង្គ្រោះជាតិមួយចំនួនទៀតត្រូវបានអាជ្ញាធរចាប់ខ្លួន។ នៅថ្ងៃទី១៣ ខែមេសា ឆ្នាំ២០១៥ មុនចូលឆ្នាំខ្មែរ លោក មាជ សុវណ្ណារ៉ា និងសកម្មជនគណបក្សសង្គ្រោះជាតិទាំងនោះត្រូវបានដោះលែងឲ្យនៅក្រៅឃុំបណ្តោះអាសន្ន បន្ទាប់ពីលោកនាយករដ្ឋមន្ត្រី ហ៊ុន សែន និងប្រធានគណបក្សសង្គ្រោះជាតិលោក សម រង្ស៊ី បានជួបចរចាគ្នា៕
សរសេរមកកាន់លោក ស៊ុន ណារិន តាមរយៈsun_narin@vodhotnews.com
No comments:
Post a Comment