2015-08-23 rfa
ប៊ីដុងថ្នាំពុលដែលអាជ្ញាធរវៀតណាម ប្រើបាញ់លើដំណាំស្រូវ
ដំឡូងមី របស់ពលរដ្ឋនៅស្រុកមេមត់ ខេត្តត្បូងឃ្មុំ កាលពីថ្ងៃទី១៩
មេសា ឆ្នាំ២០១៥។
RFA/Saut Sokprathna
|
ប្រជាពលរដ្ឋ នៅឃុំជាំ ស្រុកមេមត់ ខេត្តត្បូងឃ្មុំ ដែលមានដីនៅក្បែរតំបន់មានជម្លោះព្រំដែនអះអាងថា ពួកគាត់នឹងមិនធ្វើតាមការបញ្ជារបស់សមត្ថកិច្ចវៀតណាម ឡើយ។ ការអះអាងនេះ បន្ទាប់ពីពលរដ្ឋខ្មែរទៅសាបព្រោះស្រូវលើដីរបស់ខ្លួន ប៉ុន្តែអាជ្ញាធរវៀតណាម មកប្រាប់ឲ្យពួកគាត់បំផ្លាញស្រូវនោះចោល។ ចំណែកអាជ្ញាធរមូលដ្ឋានយល់ថា ទង្វើរបស់សមត្ថកិច្ចវៀតណាម គឺជារឿងមិនអាចទទួលយកបាន។
ប្រជាពលរដ្ឋនៅភូមិជើង ឃុំជាំ ស្នើឲ្យអាជ្ញាធរខ្មែរចាត់វិធានការលើបញ្ហាសមត្ថកិច្ចការពារព្រំដែន វៀតណាម ដែលចេះតែមកគំរាមកំហែងពួកគាត់ ហើយថែមទាំងបញ្ជាឲ្យពលរដ្ឋយកគ្រឿងចក្រទៅភ្ជួររាស់លើដីរបស់ ខ្លួនដែលទើបនឹងសាបព្រោះចោលទៀតផង ដោយអះអាងថា ដីនោះគឺជារបស់ពួកគេ។ អ្នកភូមិថា នេះជាសកម្មភាពបំពានមកលើពលរដ្ឋខ្មែរជារឿយៗ ទាំងដឹងថាដីនោះមិនស្ថិតនៅចំណុចដីជម្លោះ ឬតំបន់ដីជាង ១៦ហិកតារ ដែលរាជរដ្ឋាភិបាលខ្មែរធ្លាប់អះអាងថាជារបស់វៀតណាម ក៏ដោយ។
ពលរដ្ឋ ម្ចាស់ដីរស់នៅភូមិជើង លោក គ ស្ងួន មានប្រសាសន៍ថា ដីជាង ២ហិកតារដែលលោកមាន គឺមិនស្ថិតនៅក្នុងតំបន់ជាំប្រាំល្វែង ដែលជាចំណុចមានជម្លោះកន្លងមកនោះទេ។ លោកបន្តថា នៅពេលលោកយកត្រាក់ទ័រទៅភ្ជួរដីរបស់ខ្លួន ដើម្បីសាបព្រោះស្រូវនារដូវភ្លៀងដូចរាល់ឆ្នាំកាលពីថ្ងៃទី១៩ សីហា ក៏ប៉ុន្តែត្រូវបានកងកម្លាំងវៀតណាម គំរាមកំហែងឲ្យបញ្ឈប់សកម្មភាពភ្ជួររាស់តទៅទៀត។ យ៉ាងណា លោកនៅតែបន្តធ្វើ ហើយក៏បានយកស្រូវទៅសាបព្រោះដូចធម្មតា រហូតដល់ថ្ងៃទី២១ សីហា ពួកគេប្រាប់លោកឲ្យយកគ្រឿងចក្រទៅភ្ជួរស្រូវដែលទើបនឹងព្រោះនោះ ចោលវិញ តែលោកបានទាត់ចោលការបញ្ជានេះ៖ «ដីខ្ញុំអាក្រោមហ្នឹងគេមិនឲ្យវ៉ៃណាបង ទោះបីជាមួយជំហានងាប់ មួយជំហានរស់ ក៏នៅតែវ៉ៃដែរបង»។
កាលពីថ្ងៃ ទី១៩ សីហា កម្លាំងចម្រុះរបស់អាជ្ញាធរស្រុកមេមត់ ក៏បានចុះទៅពិភាក្សាជាមួយអាជ្ញាធរព្រំដែនវៀតណាម ប៉ុន្តែមិនបានលទ្ធផលអ្វីនោះទេ។ ក្រោយមក អាជ្ញាធរឃុំក៏បានធ្វើលិខិតទៅអាជ្ញាធរស្រុកនៅថ្ងៃទី២០ សីហា ដោយបញ្ជាក់ពីសកម្មភាពអាជ្ញាធរព្រំដែនវៀតណាម នៅតែបន្តហាមឃាត់ពលរដ្ឋខ្មែរមិនឲ្យធ្វើស្រែលើដីរបស់ខ្លួន នៅចំណុចព្រៃត្នោត ចម្ងាយប្រមាណ ១ពាន់ម៉ែត្រពីបង្គោលព្រំដែនលេខ៩៥ ឆ្ពោះទៅបង្គោលព្រំដែនលេខ៩៤។ បន្ថែមពីនេះ នៅថ្ងៃទី២១ សីហា កងកម្លាំងវៀតណាម ដែលមានទាំងកាំភ្លើងផងនោះ ថែមទាំងបង្គាប់បញ្ជាឲ្យពលរដ្ឋខ្មែរទៅបំផ្លាញដំណាំស្រូវរបស់ ខ្លួនដែលទើបសាបព្រោះចោលទៀតផង។
វិទ្យុអាស៊ីសេរី មិនអាចទាក់ទងអភិបាលស្រុកមេមត់ និងប៉ូលិសព្រំដែននៅឃុំជាំ ដើម្បីបញ្ជាក់បន្ថែមបានទេនៅថ្ងៃទី២៣ សីហា។ ប៉ុន្តែកន្លងមក អាជ្ញាធរខេត្តធ្លាប់អះអាងថា ដីតំបន់នោះនៅមិនទាន់បែងចែកឲ្យបានច្បាស់លាស់ ទើបអាជ្ញាធរប្រទេសទាំងពីរសម្រេចឲ្យពលរដ្ឋទាំងសងខាង អាចរក្សាសិទ្ធិធ្វើស្រែចម្ការលើដីធ្លាប់អាស្រ័យផលពីមុនមកបាន ដដែល ដោយរង់ចាំអាជ្ញាធរថ្នាក់ជាតិសម្រេចជាផ្លូវការ ទើបមានការផ្លាស់ប្ដូរជាក្រោយ។
ទោះបីជាយ៉ាងណាក៏ដោយ គោលការណ៍ត្រង់ចំណុចនេះ អាជ្ញាធរខ្មែរ គឺគោរពបានប្រសើរជាងអាជ្ញាធរវៀតណាម ពោលគឺអាជ្ញាធរវៀតណាម តែងបង្កើតសកម្មភាពហាមឃាត់ និងគំរាមកំហែងពលរដ្ឋខ្មែរបែបនេះជារឿយៗ។
ចំណែកមេឃុំស្ដីទី នៃឃុំជាំ លោក អ៊ូច អឿន មានប្រសាសន៍ថា ខាងអាជ្ញាធរបានទៅពិភាក្សាគ្នាពីបញ្ហានេះជាមួយអាជ្ញាធរព្រំដែន វៀតណាម ជាច្រើនដង ដោយបញ្ជាក់ថា ដីនោះជាដីពលរដ្ឋខ្មែរធ្លាប់អាស្រ័យផលជាយូរមកហើយ ប៉ុន្តែពួកគេនៅតែទាមទារឲ្យពលរដ្ឋខ្មែរឈប់ធ្វើស្រែ ព្រមទាំងបញ្ជាឲ្យបំផ្លាញស្រូវដែលពួកគាត់ទើបនឹងសាបព្រោះ។ លើសពីនេះទៀត កងកម្លាំងវៀតណាម ថែមទាំងគំរាមរកបាញ់ពលរដ្ឋម្ចាស់ដីជាដើម ហើយលោកយល់ថា ទង្វើនេះជារឿងមួយមិនត្រឹមត្រូវ និងជាការរំលោភសិទ្ធិមនុស្សធ្ងន់ធ្ងរ៖ «ពលរដ្ឋកម្ពុជា ធ្វើត្រង់ណាឲ្យធ្វើត្រង់ហ្នឹងមិនអាចដោះដូរបានទេ ព្រោះរង់ចាំការចរចាដោះស្រាយ។ នេះអត់មានដោះស្រាយផង មកដេញគ្នាហ្មង។ ដេញហ្នឹងជាលក្ខណៈកម្មសិទ្ធិរបស់គេហ្មង គេដេកចាំហ្មង»។
ទាក់ទងបញ្ហានេះ មន្ត្រីសម្របសម្រួលនៃសមាគមការពារសិទ្ធិមនុស្សអាដហុក (ADHOC) ខេត្តត្បូងឃ្មុំ លោក នាង សុវ៉ាត មានប្រសាសន៍ថា សកម្មភាពទាំងនេះត្រូវដោះស្រាយឲ្យបានច្បាស់លាស់ បើមិនដូច្នេះទេ គឺបង្ហាញថាអធិបតេយ្យភាពរបស់កម្ពុជា គឺនៅតែទន់ខ្សោយជាងប្រទេសវៀតណាម៖ «យើងយកអាលាយលក្ខណ៍អក្សរទៅនិយាយគ្នាឲ្យច្បាស់ទៅ ថាចាំពេលរាជរដ្ឋាភិបាលយើងរៀបចំបានស្រួលបួលហើយ ចាំយើងធ្វើទៅតាមអ្វីដែលរដ្ឋាភិបាលលោកបានធ្វើទៅ។ នេះទើបជារឿងមួយដែលធ្វើឲ្យរឿងព្រំដែនអាចស្ងប់ស្ងាត់»។
លោក បន្ថែមថា ប្រសិនបើសកម្មភាពអាជ្ញាធរវៀតណាម នៅតែបន្តគំរាមកំហែងពលរដ្ឋខ្មែរ គឺមិនអាចធ្វើឲ្យស្ថានភាពតាមព្រំដែនស្ងប់ស្ងាត់បានឡើយ។ ជាងនេះទៀត អ្នកទទួលរងផលប៉ះពាល់ខ្លាំងជាងគេ គឺប្រជាពលរដ្ឋកម្ពុជា តែម្តង៕
No comments:
Post a Comment