2015-08-04 rfa
 |
| សកម្មភាពមន្ត្រីទំនាក់ទំនងព្រំដែនកម្ពុជា-ថៃ រារាំងអ្នកកាសែតមិនឲ្យចូលយកព័ត៌មាននៅមុខសណ្ឋាគារ លីហេង ឆាយ ក្រុងប៉ោយប៉ែត ខេត្តបន្ទាយមានជ័យ នៅថ្ងៃទី៤ ខែសីហា ឆ្នាំ២០១៥។
Photo Provided
|
អ្នកយកព័ត៌មាននៅក្រុងប៉ោយប៉ែត ខេត្តបន្ទាយមានជ័យ ចោទប្រកាន់មន្ត្រីការិយាល័យទំនាក់ទំនងព្រំដែនកម្ពុជា-ថៃ ថារារាំងអ្នកកាសែតមិនឲ្យចូលយកព័ត៌មាន និងផ្ដិតយករូបភាព ដើម្បីផ្សព្វផ្សាយដល់សាធារណជនបានដឹង នៅក្នុងកិច្ចប្រជុំបូកសរុបការងារប្រចាំឆមាស និងផ្លាស់ប្ដូរតំណែងមន្ត្រីប្រចាំការច្រកមួយចំនួននាសណ្ឋាគារ លីហេង ឆាយ ក្រុងប៉ោយប៉ែត នៅព្រឹកថ្ងៃទី៤ សីហា។
ក្រុមអ្នកកាសែត ហៅការរារាំងពីសំណាក់មន្ត្រីទំនាក់ទំនងព្រំដែននេះ ថាជាការរឹតត្បិតសិទ្ធិសេរីភាពដល់អ្នកសារព័ត៌មាន។
ក្រុមអ្នកកាសែតនៅក្រុងប៉ោយប៉ែត ប្រតិកម្មភ្លាមៗទៅនឹងមន្ត្រីការិយាល័យទំនាក់ទំនងព្រំដែនកម្ពុជា-ថៃ ដែលមិនអនុញ្ញាតឲ្យពួកគាត់ចូលយកព័ត៌មាននៅក្នុងកិច្ចប្រជុំនោះថា ជាកាយវិការមួយក្នុងចេតនាអាក្រក់បិទបាំងដល់អ្នកសារព័ត៌មាន ដើម្បីមិនឲ្យធ្វើការផ្សព្វផ្សាយចេញទៅខាងក្រៅ។
ក្រុមអ្នកសារព័ត៌មានប្រចាំក្រុងប៉ោយប៉ែត ខេត្តបន្ទាយមានជ័យ ថ្លែងនៅថ្ងៃទី៤ សីហា ថា មន្ត្រីការិយាល័យទំនាក់ទំនងព្រំដែនកម្ពុជា-ថៃ បានរារាំងអ្នកកាសែតគ្រប់ស្ថាប័ន លើកលែងតែអ្នកយកព័ត៌មានរបស់ទូរទស្សន៍ប៉ុស្តិ៍លេខ៥ មួយប៉ុណ្ណោះ។ ក្រៅពីនោះ គឺមិនអនុញ្ញាតឲ្យចូលយកព័ត៌មាននៃកិច្ចប្រជុំបូកសរុបការងារប្រចាំឆមាសទី១ និងទិសដៅឆមាសទី២ និងការផ្លាស់ប្ដូរមុខតំណែងមន្ត្រីប្រចាំការតាមច្រកព្រំដែនមួយចំនួន ដែលក្រោមអធិបតីភាព លោក សៀក សុជាតិ អគ្គនាយកទីចាត់ការការងារព្រំដែនកម្ពុជា និងមន្ត្រីពាក់ព័ន្ធមួយចំនួនទៀតនៅក្រុងប៉ោយប៉ែត នៅព្រឹកថ្ងៃទី៤ សីហា នោះទេ។ ក្រុមអ្នកកាសែតឲ្យដឹងទៀតថា ការរារាំងអ្នកសារព័ត៌មាននេះ មន្ត្រីទំនាក់ទំនងព្រំដែនហាក់មានព័ត៌មានមិនល្អតាមបណ្ដាព្រំដែនកម្ពុជា-ថៃ បិទបាំងដល់អ្នកសារព័ត៌មាន ដើម្បីកុំឲ្យធ្វើការផ្សព្វផ្សាយចេញទៅខាងក្រៅបានដឹង៖ «ពេលដែលខ្ញុំចូលទៅយកព័ត៌មាន មន្ត្រីយោធាប្រមាណ ៣នាក់ រារាំងមិនឲ្យខ្ញុំចូលយកព័ត៌មានទេ។ ដោយមន្ត្រីទាំងនោះលើកឡើងថា វាជាការប្រជុំផ្ទៃក្នុងរបស់អង្គភាពខ្លួនទេ។ ខ្ញុំមានការអាម៉ាស់មុខខ្លាំងណាស់ នៅពេលដែលមន្ត្រីទំនាក់ទំនងព្រំដែន គេបណ្ដេញពួកខ្ញុំចេញដូចជាសត្វធាតុ មិនឲ្យចូលយកព័ត៌មាន»។
វិទ្យុអាស៊ីសេរី ពុំអាចទាក់ទងប្រធានការិយាល័យទំនាក់ទំនងព្រំដែនកម្ពុជា-ថៃ គឺលោក ពេជ្រ វណ្ណា ដើម្បីអត្ថាធិប្បាយជុំវិញបញ្ហានេះបានទេនៅថ្ងៃទី៤ សីហា ដោយទូរស័ព្ទរបស់លោកត្រូវមន្ត្រីក្រោមឱវាទទទួលជំនួស ហើយប្រាប់ថាលោកកំពុងជាប់រវល់។
ទោះយ៉ាងនេះក្ដី មន្ត្រីសម្របសម្រួលនៃសមាគមការពារសិទ្ធិមនុស្សអាដហុក (Adhoc) ខេត្តបន្ទាយមានជ័យ លោក ស៊ុំ ច័ន្ទគា មានប្រសាសន៍ថា មន្ត្រីទំនាក់ទំនងព្រំដែនកម្ពុជា-ថៃ មិនត្រូវរារាំងអ្នកកាសែតមិនឲ្យចូលយកព័ត៌មានក្នុងកិច្ចប្រជុំបើកចំហនោះទេ លើកលែងតែកិច្ចប្រជុំនោះមានពាក់ព័ន្ធនឹងការងារសម្ងាត់របស់ប្រទេសជាតិប៉ុណ្ណោះ។ លោកហៅការរារាំងអ្នកកាសែតនេះ ថាជាការបិទសិទ្ធិសេរីភាពរបស់អ្នកសារព័ត៌មាន ដែលទាញទម្លាក់របបប្រជាធិបតេយ្យក្មេងខ្ចីរបស់កម្ពុជា ដើរថយក្រោយវិញ៖ «ដូច្នេះរាល់កិច្ចប្រជុំដែលជាការងារបម្រើប្រជាពលរដ្ឋ គឺមិនត្រូវលាក់លៀមនោះទេ។ ការលាក់បាំងមានតែមន្ត្រីនោះបានប្រព្រឹត្តអ្វីខុស ឬមានបញ្ហាអ្វីមួយដែលធ្វើឲ្យភ័យខ្លួនទេ ទើបគេប្រជុំធ្វើការបិទបាំងមិនឲ្យអ្នកកាសែតចូលយកព័ត៌មានបែបនេះ»។
មន្ត្រីសង្គមស៊ីវិលមើលឃើញថា នៅរយៈពេលប៉ុន្មានខែចុងក្រោយមកនេះ អ្នកសារព័ត៌មានមួយចំនួន ត្រូវបានមន្ត្រីស្ថាប័នកំពូលៗរបស់រដ្ឋ រារាំង និងបណ្ដេញចេញ ក្នុងពេលចុះយកព័ត៌មានជាបន្តបន្ទាប់។ កាលពីពេលថ្មីៗនេះ លោក ឈាង វុន មន្ត្រីនាំពាក្យនៃរដ្ឋសភា ក៏ធ្លាប់បណ្ដេញអ្នកកាសែតចេញពីរដ្ឋសភាដែរ៕
No comments:
Post a Comment