ដោយ៖ ទូច សុខា | ថ្ងៃចន្ទ ទី3 សីហា 2015,
លោកនាយករដ្ឋមន្ត្រី ហ៊ុន សែន នៅថ្ងៃចន្ទនេះបានរំឭកជាថ្មី ឲ្យកម្លាំងមានសមត្ថកិច្ចតាមចាប់ខ្លួនអ្នកជាប់ពាក់ព័ន្ធក្នុងអំពើហិង្សា ដែលកើតមាននៅក្បែរទីលានប្រជាធិបតេយ្យកាលពីខែកក្កដា ឆ្នាំ២០១៤ និងព្រមានវិធានការផ្លូវច្បាប់លើតំណាងរាស្រ្តសង្រ្គោះជាតិ៧រូប។
ក្នុងពិធីសម្ពោធស្ពានទន្លេបាសាក់តាខ្មៅ លោកនាយករដ្ឋមន្ត្រីបានថ្លែងថាអំពើហិង្សាដែលកើតមានកាលពីថ្ងៃទី១៥ ខែកក្កដា ឆ្នាំ២០១៤ គឺជាបទល្មើសព្រហ្មទណ្ឌមិនអាចចរចាបញ្ចប់តាមរយៈវប្បធម៌សន្ទនានោះទេ។ លោក ហ៊ុន សែន បានក្រើនរំឭកពីវិធានការផ្លូវច្បាប់លើតំណាងរាស្រ្ត៧រូបនិងអ្នកពាក់ព័ន្ធផ្សេងៗទៀត។ លោកបានបញ្ជាក់ថា៖ “ហើយអ្នកទាំង៧នាក់ផ្សេងទៀត ខ្ញុំមិនមែនគំរាមទេតុលាការហៅ សុំអញ្ចើញចូល បើមិនចូលទេប្រយ័ត្នគេកាត់កំបាំងមុខ មានន័យថាខ្លួនបោះបង់សិទ្ធិការពារខ្លួនហើយ”។
កាលពីឆ្នាំ២០១៤ តំណាងរាស្ត្រ៧របស់គណបក្សសង្គ្រោះជាតិ រួមមាន លោកស្រី មូរ សុខហួរ លោក ម៉ែន សុថាវរិន្ទ្រ លោក ហូរ វ៉ាន់ លោក លោក រៀល ខេមរិន្ទ្រ លោក កែវ ភារម្យ លោក ឡុង រី លោក នុត រំដួល បានជាប់ពន្ធនាគារ ពាក់ព័ន្ធនឹងហិង្សានៅក្បែរទីលានប្រជាធិបតេយ្យ។ ពួកគេត្រូវបានដោះលែងវិញ ក្រោយពីគណបក្សប្រជាជនកម្ពុជានិងគណបក្សសង្រ្គោះជាតិបានឯកភាពលើកិច្ចព្រមព្រៀងនយោបាយមួយកាលពីថ្ងៃទី២២ខែកក្កដាឆ្នាំ២០១៤។
នៅថ្ងៃចន្ទនេះ លោកនាយករដ្ឋមន្ត្រី ហ៊ុន សែន ក៏អំពាវនាវឲ្យអ្នកដែលជាប់ពាក់ព័ន្ធនឹងអំពើហិង្សានៅក្បែរទីលានប្រជាធិបតេយ្យផ្សេងទៀត ចេញមកបង្ហាញខ្លួន មុននឹងសមត្ថកិច្ចចាប់ខ្លួន។ លោកបញ្ជាក់ថាកិច្ចព្រមព្រៀងនយោបាយមិនអាចបញ្ចប់បទល្មើសព្រហ្មទណ្ឌបាននោះទេ។ លោកបន្ថែមថា៖ "ហើយកុំថារឿងនេះរឿងនយោបាយ មើលកិច្ចព្រមព្រៀង...ថ្ងៃ២២ កក្កដាឆ្នាំ២០១៤ ...ព្រោះអត់មានកិច្ចព្រមព្រៀងណាទៅត្រួតត្រាបទល្មើសព្រហ្មទណ្ឌតាមផ្លូវតុលាការបានទេ ... ឥឡូវសន្ទនានៅតែសន្ទនា ប៉ុន្តែរឿងច្បាប់ទាក់ទងនឹងបទល្មើសព្រហ្មទណ្ឌអត់សន្ទនាជាមួយ បិទផ្លូវតវ៉ាអាហ្នឹង ខ្ញុំអត់មានសិទ្ធិ ហើយបញ្ជាតាមចាប់ខ្លួននៅតែតាមចាប់ខ្លួន ព្រោះអាហ្នឹងវាជារឿងព្រហ្មទណ្ឌ លោកឯងមិនតាមចាប់ខ្លួនប៉ូលិសខុស”។
ទាក់ទងនឹងការលើកឡើងរបស់លោកនាយករដ្ឋមន្ត្រី ហ៊ុន សែន តំណាងរាស្រ្តគណបក្សសង្គ្រោះជាតិ លោក ហូរ វ៉ាន់ បញ្ជាក់ថារាល់បញ្ហាដែលកើតមានឡើងទាំងអស់គឺជារឿងនយោបាយ ហើយគណបក្សទាំងពីរនឹងនៅតែបន្តដោះស្រាយគ្នាបន្តទៀតតាមយន្តការនយោបាយ។ លោកបន្ថែមថា៖ "ព្រោះដូចខ្ញុំនិយាយអញ្ចឹងរឿងទាំងអស់គឺជារឿងនយោបាយ ហើយអ្វីៗទាំងអស់យើងដោះស្រាយគ្នាតាមបែបនយោបាយ”។
អ្នកគ្រប់គ្រងបច្ចេកទេសស៊ើបអង្កេតនៃអង្គការលីកាដូ លោក អំ សំអាត មានប្រសាសន៍ថាការលើកឡើងរបស់លោកនាយករដ្ឋមន្ត្រីគឺកើតឡើងបន្ទាប់ពីមានភាពតានតឹងផ្នែកនយោបាយ។ លោកចាត់ទុកថាការលើកឡើងរបស់លោកនាយករដ្ឋមន្ត្រីនេះគឺជាការដុតកម្តៅនយោបាយមួយបន្ថែមទៀតផងដែរ។ លោកបន្តថាការអំពើហិង្សាដែលកើតមាននៅទីលានប្រជាធិបតេយ្យ កើតឡើងមកពីការបិទទីលានប្រជាធិបតេយ្យ មិនឲ្យមានការចូលទៅសម្តែងមតិបាន។ លោកបញ្ជាក់ថាព្រឹត្តិការណ៍នេះកើតចេញពីគំនុំដែលកន្លងមកសមត្ថកិច្ចបានបង្ក្រាបទៅលើអ្នកតវ៉ា ហើយគ្មានចំណាត់ការផ្លូវច្បាប់ និងផ្តល់យុត្តិធម៌សម្រាប់ក្រុមអ្នកតវ៉ានាពេលកន្លងមក។
លោកបន្ថែមថា៖ “អានេះហើយដែលធ្វើឲ្យរីករាលដាល វាក្លាយជាគំនុំ អញ្ចឹងពេលដែលមានគំនុំ ហើយពេលដែលភាគីម្ខាងទៀតមានឱកាសវិញ នាំឲ្យមានការសងសឹកវិញ”។
គួរបញ្ជាក់ដែរថា ក្រោយហិង្សាក្បែរទីលានប្រជាធិបតេយ្យ លោក មាជ សុវណ្ណារ៉ា និងសកម្មជនគណបក្សសង្គ្រោះជាតិមួយចំនួនទៀតត្រូវបានអាជ្ញាធរ ចាប់ខ្លួន។ នៅថ្ងៃទី១៣ ខែមេសា ឆ្នាំ២០១៥ មុនចូលឆ្នាំខ្មែរ លោក មាជ សុវណ្ណារ៉ា និងសកម្មជនគណបក្សសង្គ្រោះជាតិទាំងនោះត្រូវបានដោះលែងឲ្យនៅក្រៅឃុំ បណ្តោះអាសន្ន បន្ទាប់ពីលោកនាយករដ្ឋមន្ត្រី ហ៊ុន សែន និងប្រធានគណបក្សសង្គ្រោះជាតិលោក សម រង្ស៊ី បានជួបចរចាគ្នា។ ដោយឡែកនៅថ្ងៃទី២១ខែកក្កដា សាលាដំបូងរាជធានីភ្នំពេញបានផ្ដន្ទាទោសសកម្មជនគណបក្សសង្រ្គោះជាតិ ១១នាក់នេះឲ្យជាប់ពន្ធនាគារពី៧ឆ្នាំទៅ២០ឆ្នាំពីបទដឹកនាំនិងចូលរួមក្នុងចលនា កុប្បកម្មនាំឲ្យមានហិង្សានៅក្បែរទីលានប្រ ជាធិបតេយ្យកាលពីខែកក្កដាឆ្នាំ២០១៤៕
សូមសរសេរមកកាន់លោក ទូច សុខា តាមរយៈ sokha@vodhotnews.com
No comments:
Post a Comment