មន្ត្រីយោធាខ្មែរម្នាក់ត្រូវទាហានថៃបាញ់សម្លាប់នៅព្រំដែន
ដោយ ខែ សុណង
2015-10-03 rfa
មន្ត្រីយោធាខ្មែរម្នាក់ដែលបម្រើការក្នុងអង្គភាពលេខ៤៣៥ ប្រចាំខេត្តបាត់ដំបង ត្រូវបានទាហានឈុតខ្មៅថៃ ឈរជើងតាមខ្សែបន្ទាត់ព្រំដែនក្នុងខេត្តចាន់បុរី (Chanthaburi) បាញ់សម្លាប់ភ្លាមៗនៅក្នុងទឹកដីថៃ កាលពីរាត្រីថ្ងៃទី២ ខែតុលា ឆ្នាំ២០១៥។
មន្ត្រីការពារច្រកព្រំដែនប្រចាំខេត្តប៉ៃលិន សន្និដ្ឋានថា ការបាញ់ប្រហាររបស់ទាហានឈុតខ្មៅថៃ មកលើមន្ត្រីយោធាខ្មែរ គឺពាក់ព័ន្ធនឹងរឿងគំនុំបុគ្គល។
មេបញ្ជាការវរៈការពារព្រំដែនគោកលេខ៨២១ ប្រចាំខេត្តប៉ៃលិន លោក អ៊ុំ នន មានប្រសាសន៍នៅល្ងាចថ្ងៃទី៣ ខែតុលា ថា ការបាញ់សម្លាប់មន្ត្រីយោធាខ្មែរម្នាក់ពីសំណាក់ទាហានឈុតខ្មៅថៃ ក្នុងខេត្តចាន់បុរី គឺដោយសាររឿងជនរងគ្រោះមានទំនាក់ទំនងស្នេហាជាមួយប្រពន្ធទាហានឈុតខ្មៅថៃ។
លោកថា មន្ត្រីយោធាខ្មែរត្រូវបាញ់ចំក្បាលស្លាប់ភ្លាមៗនៅក្នុងទឹកដីខេត្តចាន់បុរី តែម្ដង៖ «នេះពិតជារឿងគំនុំរឿងបុគ្គល តាមព័ត៌មានពីមេប៉ុស្តិ៍ លោកមេរងផ្នែកខាងគ្រឿងញៀន គឺថា គាត់មានទំនាក់ទំនងមួយក្រុមគ្រួសារគេ ប្រពន្ធគេ បានរហូតដល់គេបាញ់។ បាញ់នៅខេត្តចាន់បុរី អត់មានឆ្លងដែនដឹកគ្រញូង ឈើខុសច្បាប់អីផង ទៅតាមច្រកព្រំ។ មេប៉ុស្តិ៍ខ្ញុំរាយការណ៍មក គេមានប៉ាសស្ព័រអីកំផ្លេរបស់គេ»។
ជនរងគ្រោះត្រូវបានគេរាយការណ៍ថា មានឈ្មោះ ពេជ្រ សេត ភេទប្រុស អាយុ ៣៨ឆ្នាំ មានស្រុកកំណើតនៅភូមិទំនប់ទឹក ឃុំបវេល ស្រុកបវេល ខេត្តបាត់ដំបង ដោយបច្ចុប្បន្ននៅភូមិអូរឈើក្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ជាមន្ត្រីយោធាក្នុងអង្គភាពលេខ៤៣៥ ប្រចាំខេត្តបាត់ដំបង ត្រូវបានទាហានឈុតខ្មៅថៃ របស់កងវរៈសេនាតូចលេខ៤៣ ឈរជើងតាមខ្សែបន្ទាត់ព្រំដែនត្រង់ចំណុចភូមិនើនឌិនដែង ក្នុងស្រុកពោងណាំរ៉ន ខេត្តចាន់បុរី បាញ់ចំក្បាលស្លាប់ភ្លាមៗ កាលពីវេលាម៉ោង ៨ និង ២០នាទីយប់ ថ្ងៃទី២ ខែតុលា ឆ្នាំ២០១៥។ ប៉ុន្តែសេចក្ដីរាយការណ៍របស់ព័ត៌មានក្នុងស្រុកបានរាយការណ៍ថា ជនរងគ្រោះបានលបលួចឆ្លងដែនចូលទៅក្នុងទឹកដីថៃ ត្រង់ចំណុចចន្លោះបង្គោលព្រំដែនលេខ៦២ និង ៦៤ ដើម្បីទៅនាំយកម៉ូតូ ឬរថយន្តគេចពន្ធ ចូលមកក្នុងទឹកដីកម្ពុជា ពិសេសគឺនាំយកឈើគ្រញូងឆ្លងដែនខុសច្បាប់ ដែលសេចក្ដីរាយការណ៍នេះផ្ទុយពីមន្ត្រីការពារព្រំដែនគោកដែលថា ការបាញ់សម្លាប់ទាក់ទងនឹងរឿងគំនុំ។
វិទ្យុអាស៊ីសេរី មិនអាចទាក់ទងប្រធានទំនាក់ទំនងច្រកព្រំដែនខ្មែរ-ថៃ លោក ទី សុខា ដើម្បីបកស្រាយចំពោះចំណាត់ការទំនាក់ទំនងទៅខាងភាគីថៃ ជុំវិញបញ្ហានេះ បាននៅឡើយទេ នៅថ្ងៃទី៣ ខែតុលា។
ទោះជាយ៉ាងណាក៏ដោយ មេបញ្ជាការការពារព្រំដែនគោកលេខ៨២១ ប្រចាំខេត្តប៉ៃលិន លោក អ៊ុំ នន មានទស្សនៈថា ថ្វីត្បិតតែការបាញ់សម្លាប់នេះក្នុងរឿងគំនុំក្ដី ប៉ុន្តែលោកយល់ថា នេះជាទង្វើខុសច្បាប់ និងកិច្ចព្រមព្រៀងរវាងភាគីទាំងពីរដែលបានចុះហត្ថលេខារួមគ្នាលើការយោគយល់គ្នា៖ «នេះជាករណីទី១ហើយ។ អាជ្ញាធរមានទំនាក់ទំនងល្អណាស់ជាមួយភាគីខាងថៃ។ ធ្លាប់បានប្រជុំហាមឃាត់ដាច់ខាត មិនឲ្យបាញ់សម្លាប់តាមបន្ទាត់ព្រំដែន ឬខាងក្នុងទេ មានរឿងអីត្រូវមានការនិយាយគ្នា ដោះដូរគ្នាតាមជាក់ស្ដែងដែលគួរនិយាយគ្នាទៅបាន»។
រហូតមកដល់ល្ងាចថ្ងៃទី៣ ខែតុលា អាជ្ញាធរពាក់ព័ន្ធបានអះអាងថា មិនទាន់បញ្ជូនសាកសពមន្ត្រីយោធារូបនោះមកកម្ពុជា វិញនៅឡើយ ហើយភាគីថៃ នៅរក្សាសពទុកនៅមន្ទីរពេទ្យខេត្តចានបុរី៕
1 comment:
So what is hun sen govt going to do about it?. not much.At least he got shot dead for love, and died in vain if no justice is ever not found for him which under this regime is unlikely. I hope his family gets his body back home so they can give him proper burial .
Post a Comment