សហជីពជំរុញរដ្ឋាភិបាលឲ្យពង្រឹងរបបធានាសន្តិសុខសង្គមនិងពង្រីកដល់ពលរដ្ឋគ្រប់រូប
ដោយ ឡេង ម៉ាលី
rfa 2015-11-22
 |
| ប្រធានសហភាពការងារកម្ពុជា លោក អាត់ ធន់ បង្ហាញតួលេខពលរដ្ឋកម្ពុជា ដែលទទួលបានការធានាលើការថែទាំសុខភាពដោយបេឡាជាតិរបបសន្តិសុខសង្គម (ប.ស.ស) កាលពីថ្ងៃទី២២ ខែវិច្ឆិកា ឆ្នាំ២០១៥។
RFA/Leng Maly
|
មន្ត្រីតំណាងសហជីពកម្មករមកពីវិស័យផ្សេងៗចំនួនជាង ៧០នាក់ ជួបពិភាក្សាគ្នានៅថ្ងៃទី២២ វិច្ឆិកា ដើម្បីរៀបចំអនុសាសន៍ដាក់ជូនរាជរដ្ឋាភិបាល ឲ្យពង្រឹង និងសម្រួលការប្រើប្រាស់ប្រព័ន្ធបេឡាជាតិរបបសន្តិសុខសង្គមបច្ចុប្បន្ន ដែលធានាគាំពារដល់កម្មករនៅពេលគ្រោះថ្នាក់ និងមានជំងឺក្នុងការងារ។
ប្រធានសហភាពការងារកម្ពុជា លោក អាត់ ធន់ ឲ្យដឹងថា កម្មករជាច្រើនលាននាក់នៅតែមិនទាន់ទទួលបានសេវាធានាលើការថែទាំសុខភាពនៅឡើយ ក្នុងពេលដែលកម្មករខ្លះបានចុះបញ្ជីជាមួយប្រព័ន្ធបេឡាជាតិរបបសន្តិសុខសង្គម ហៅកាត់ថា ប.ស.ស ហើយក៏ដោយ។
លោក អាត់ ធន់ ក៏ស្នើសុំឲ្យរាជរដ្ឋាភិបាល សម្រួលដល់ការអនុវត្តប្រព័ន្ធនេះបន្ថែមទៀត ថ្វីបើពេលនេះ កម្មករបានទទួលសេវាធានាសុខភាព និងគ្រោះថ្នាក់ជាបណ្ដើរហើយក្ដី។ លោកសុំឲ្យពង្រីកការចុះបញ្ជីដល់កម្មករផ្សេងទៀត ដែលស្ថិតនៅក្រោមច្បាប់ស្ដីពីការងារកម្ពុជា ដូចគ្នា៖ «ប្រជាពលរដ្ឋ ១៥លាននាក់ គឺមាននៅក្នុងវិស័យឯកជន ១លាន ២សែននាក់ ត្រូវបានធានា មន្ត្រីរាជការស៊ីវិលមានប្រហែលជិត ២០ម៉ឺននាក់ ត្រូវបានធានា ហើយអតីតយុទ្ធជនមានប្រហែលជា ១៥ម៉ឺន ត្រូវបានធានា ហើយនិងអ្នកនៅក្រោមបន្ទាត់ភាពក្រីក្រ ដែលរដ្ឋាភិបាលមានកាតសម្រាប់ចូលមន្ទីរពេទ្យដោយឥតគិតថ្លៃហ្នឹងទៀត យើងគិតទៅប្រហែលថា ២លានចុះ។ អ៊ីចឹងវានៅជាង ១២លាននាក់ទៀត គឺអត់ទាន់បានធានាទេ»។
លោក អាត់ ធន់ បញ្ជាក់បន្ថែមថា រហូតមកដល់ពេលនេះ ប្រទេសកម្ពុជា នៅមិនទាន់មានប្រព័ន្ធសន្តិសុខសង្គម ដែលធានាដល់ពលរដ្ឋកម្ពុជា គ្រប់រូបទេ គឺមានតែនៅក្នុងវិស័យឯកជន ដែលជាកម្មកររៀបរយនៅតាមរោងចក្រ និងបុគ្គលិករដ្ឋចូលនិវត្តន៍។ លោកនឹងដាក់លិខិតជំរុញរដ្ឋាភិបាលឲ្យបង្កើតអាជ្ញាធរជាតិ និងច្បាប់សម្រាប់ធានាដល់កម្មករផ្សេងទៀត៖ «យើងស្នើសុំឲ្យបេឡាជាតិបច្ចុប្បន្ននេះ ចុះបញ្ជីកម្មករនិយោជិកពីម្នាក់ដល់ប្រាំបីនាក់ផង ព្រោះបច្ចុប្បន្ននេះ គឺគេធ្វើចាប់ពីប្រាំបីនាក់ឡើងមុន ដំណាក់កាលទីមួយ។ អ៊ីចឹង បើយើងពិនិត្យមើលជាង ៧ពាន់ក្រុមហ៊ុនបច្ចុប្បន្ននេះ គឺយើងឃើញថា ចុះបាន ១លាន ២សែននាក់នេះ តែអ្នកដែលចាប់ពី ៨នាក់ឡើងលើទេ តែអ្នក ៨នាក់ចុះក្រោម គឺអត់ទាន់បានចុះទេ ហើយអ្នកហ្នឹងត្រូវការការពារដោយច្បាប់ដែរ។ អ៊ីចឹងនៅពេលបង្កើតអាជ្ញាធរសង្គមជាតិនេះ រដ្ឋាភិបាលត្រូវបង្កើតច្បាប់មួយបង្កើតរបបធានាទៅលើប្រជាពលរដ្ឋ ដែលនៅសេដ្ឋកិច្ចក្រៅប្រព័ន្ធហ្នឹង ដូចជាអ្នករកស៊ីដោយខ្លួនឯង ដូចជាប្រជាពលរដ្ឋទូទៅ អ្នកធ្វើកសិកម្មដែលអត់មានការធានាហ្នឹង»។
ទាក់ទងនឹងបញ្ហានេះ អនុប្រធានបេឡាជាតិរបបសន្តិសុខសង្គម (ប.ស.ស) លោក ស៊ុម សោភ័ណ ថ្លែងថា បច្ចុប្បន្ននេះ បេឡាជាតិរបបសន្តិសុខសង្គម បានផ្ដល់សេវាធានាចេញសោហ៊ុយថែទាំសុខភាពដល់កម្មករនៅពេលមានគ្រោះថ្នាក់ និងមានជំងឺទាក់ទងនឹងការងារ នៅមន្ទីរពេទ្យដែលទទួលស្គាល់ដោយ ប.ស.ស៖ «ជាពិសេសមន្ទីរពេទ្យដែលបានចុះកិច្ចសន្យា ទោះអស់ប៉ុន្មានក៏ដោយ អាហ្នឹងជាគ្រោះថ្នាក់ការងារ យើងទូទាត់ឲ្យវិញតម្លៃពេញ ឲ្យតែមន្ទីរចុះកិច្ចសន្យា។ មាន ៩៣មន្ទីរពេទ្យទូទាំងប្រទេស ដែលយើងបានចុះកិច្ចសន្យា ក្នុងហ្នឹងមាន ៣ឯកជន។ រយៈពេលដែលយើងផ្ដល់ឲ្យ គឺរយៈពេលឈប់សម្រាកតាមវេជ្ជបញ្ជា»។
ទន្ទឹមគ្នានេះដែរ មន្ត្រីកម្មវិធីគាំពារសង្គមនៃអង្គការអន្តរជាតិខាងការងារ អ្នកស្រី ឱក ម៉ាលីកា ថ្លែងថា កម្មករដែលធ្វើការមិននៅក្រោមច្បាប់ស្ដីពីការងារ ឬក្រៅផ្លូវការ គឺជាក្រុមត្រូវពិចារណាខ្ពស់ ដើម្បីឲ្យស្របតាមគោលការណ៍នៃអង្គការអន្តរជាតិខាងការងារ៖ «សម្រាប់ជនវិស័យក្រៅផ្លូវការនេះ គឺអត់មានអីសោះ។ អ៊ីចឹងនេះ គឺអ្វីដែលខ្ញុំជឿថាបងប្អូនទាំងអស់កំពុងតែទាមទារ ហើយក្នុងនាមដៃគូអភិវឌ្ឍន៍ ក៏កំពុងទាមទារដូចគ្នា ស្នើសុំរដ្ឋាភិបាលពិចារណាទៅលើជនដែលនៅក្នុងសេដ្ឋកិច្ចក្រៅផ្លូវការ ពីព្រោះយើងហើយថា ៨០% នៃប្រជាជនយើងកំពុងធ្វើការក្នុងវិស័យនេះ ហើយអត់មានអ្វីគាំពារ»។
ស្របគ្នានេះដែរ លោក អាត់ ធន់ ថ្លែងថា ការធានាពីបេឡាជាតិរបបសន្តិសុខសង្គម ឬ ប.ស.ស ធ្វើឲ្យកម្មករមានជីវភាពប្រសើរ ព្រោះមិនចាំចេញសោហ៊ុយលើសុខភាព និងស្របតាមគោលការណ៍ ៩ចំណុចនៃអនុសញ្ញាអង្គការអន្តរជាតិខាងការងារ (ILO) ដែលត្រូវធានាដល់មនុស្សចាប់តាំងពីកើតរហូតដល់ស្លាប់។ ទាំងភាគីសហជីព និងអង្គការអន្តរជាតិខាងការងារ នៅតែបង្ហាញថា ប្រទេសកម្ពុជា នៅយឺតជាងប្រទេសដទៃក្នុងចំណោមប្រទេសអាស៊ាន ទោះបីជាមានការធានាសុខភាពខ្លះៗហើយក្ដី។ នេះជាមូលហេតុដែលសហជីព ជំរុញឲ្យមានប្រព័ន្ធរបបសន្តិសុខសង្គមថ្នាក់ជាតិសម្រាប់ជួយពលរដ្ឋកម្ពុជា ទាំងមូល៕
No comments:
Post a Comment