 |
| លោក វណ្ណ មូលីវណ្ណ ពេលសម្រាកព្យាបាលនៅមន្ទីរពេទ្យកាលពីសប្តាហ៍មុន។ រូបថត ហ្វេសប៊ុក |
បិតាស្ថាបត្យករខ្មែរធ្លាក់ខ្លួនឈឺ
Tue, 3 May 2016 ppp
ធិក កល្យាណ
សៀមរាបៈ លោក វណ្ណ មូលីវណ្ណ ដែលជាបិតាស្ថាបត្យកម្មខ្មែរទំនើបដែលមានកេរ្តិ៍ឈ្មោះល្បីល្បាញបានធ្លាក់ខ្លួនឈឺហើយបានទៅសម្រាកព្យាបាលនៅក្នុងមន្ទីរពេទ្យមួយក្នុងខេត្តសៀមរាបអស់រយៈពេលពីរសប្តាហ៍។ នេះបើតាមលោក ជួន ឈឿន អ្នកមើលថែលោក វណ្ណ មូលីវណ្ណ ដែលបានថ្លែង។
លោក ឈឿន បានថ្លែងថា៖ «គាត់បានឈឺអស់រយៈពេលពីរសប្តាហ៍ដោយសារគាត់មានជំងឺរាកហើយគាត់បានសម្រាកព្យាបាលនៅក្នុងមន្ទីរពេទ្យអន្តរជាតិ រ៉ូយាល់អង្គរ»។ ទោះយ៉ាងណាក្តីលោក ឈឿន បានថ្លែងកាលពីម្សិលមិញថាឥឡូវនេះលោក មូលីវណ្ណ កំពុងប្រសើរឡើងហើយបានត្រឡប់ទៅផ្ទះវិញហើយ។ លោកបន្តថា៖ «ឥឡូវនេះគាត់កំពុងសម្រាកនៅផ្ទះប៉ុន្តែយើងនៅតែទៅជួបពេទ្យរហូតទាល់តែគាត់ប្រសើរឡើងទាំងស្រុង»។
លោក មូលីវណ្ណ ធ្លាប់បានប្រាប់កាសែតភ្នំពេញប៉ុស្តិ៍នៅក្នុងបទសម្ភាសកម្រមួយកាលពីខែកុម្ភៈឆ្នាំមុននៅក្នុងបណ្ណាល័យក្នុងផ្ទះពីរជាន់របស់លោកក្នុងខេត្តសៀមរាបថាលោកមិនមានគម្រោងត្រឡប់មករាជធានីភ្នំពេញវិញទេ។ «ខ្ញុំនឹងចំណាយរយៈពេលចុងក្រោយនៃជីវិតរបស់ខ្ញុំរស់នៅក្នុងទឹកដីខេត្តសៀមរាប។ ខ្ញុំមិនអាចទៅណាផ្សេងទៀតបានទេពីព្រោះខ្ញុំចាស់ណាស់ហើយ»។
នៅក្នុងឆ្នាំ ១៩៥៦ លោក មូលីវណ្ណ ត្រូវបានតែងតាំងជាប្រធានស្ថាបត្យករដោយព្រះមហាក្សត្រនរោត្តម សីហនុ ហើយក្នុងឆ្នាំ ១៩៧១ នៅមុនពេលដែលលោកបានចាកចេញពីប្រទេសដែលខ្ទេចខ្ទីដោយសារភ្នក់ភ្លើងសង្គ្រាមលោក មូលីវណ្ណ បានរចនាអគារសំខាន់ៗក្នុងរាជធានីភ្នំពេញរួមមានដូចជា ពហុកីឡាដ្ឋានអូឡាំពិកដែលបច្ចុប្បន្នត្រូវបានគេពុះច្រៀកសង់អគារស្អេកស្កះធ្វើឲ្យបាត់បង់លក្ខណៈដើមស្ទើរតែទាំងស្រុង។ ចាប់តាំងពីការវិលត្រឡប់មកប្រទេសកម្ពុជាវិញក្នុងឆ្នាំ ១៩៩១ លោក មូលីវណ្ណ បានឃើញថាកេរដំណែលរបស់លោកត្រូវបានបំផ្លាញក្នុងនោះក៏មានសាលមហោស្រពទន្លេបាសាក់បានឆេះហើយត្រូវវាយកម្ទេចចោលអគារទីស្តីការគណៈរដ្ឋមន្រ្តីត្រូវបានវាយចោលនៅសល់វិមានឯករាជ្យ សាលសន្និសីទចតុមុខ និងសំណង់ជាច្រើនផ្សេងទៀត៕ PS
No comments:
Post a Comment